Пеп & Зизу ёхуд Холанд "Реал" / "Ман Сити"га ўтиши учун 5 сабаб

“Боруссия Д” яқинда ЕЧЛдан чиқиб кетди, Бундеслигада эса аввалроқ "Айнтрахт"га мағлуб бўлди. "Арилар" мавсум якунларига кўра, ЕЧЛ йўлланмасинин берувчи зонага кира олмасликлари эҳтимоли кам эмас! Европанинг асосий мусобақасисиз эса Холанд қолиб кетишни истамаслиги турган гап. Шу сабаб, ўсишдан тўхтаб қолмаслик учун футболчи ёздаёқ жамоасини ўзгартириши мумкин. Миш-мишлар оз эмас. Аммо икки асосий вариант мавжуд – "Сити" ёки "Реал". Манчестерда у дунёнинг энг яхши ҳужумчисига айланиши мумкин, лекин шу билан бирга Эрлингнинг ўзи Мадридда ўйнашни хоҳлайди...

Англияга йўл олиш учун сабаблар:
1) "Манчестер Сити”нинг маромига етказилган ҳужумкор футболи

"Реал"да Зинедин Зидан ҳамон авлодлар алмашинувини қилиб ололмаяпти ва яқин орада нима бўлади, ҳеч кимга маълум эмас. "Шаҳарликлар” эса ҳозирнинг ўзида топ-дарвозабон, мустаҳкам ҳимоя, маҳоратли ярим ҳимоячилар ва аниқ бир тизимли футболга эга. Айнан шу сабабли клуб испанияликлардан кўра, кўпроқ вазият яратмоқда ва кўпроқ гол урмоқда. Яъни Холанд Англияда шунчаки голли имкониятларга эга бўлиши мумкин. Қўшимчасига ёзда жамоани Агуэро тарк этади ва норвегиялик яқин 10 йилга дунёнинг энг бой клубларидан бирининг ҳужумдаги етакчисига айланади!

2) Гвардиола қўл остида ривожланиш

Бу салоҳиятли футболчи орзу қилиши мумкин бўлган энг идеал вариант! Чунки Зизу футбол ўйнашни ўргатмайди, у ўз ихтиёрида бўлган футболчиларнинг кучли жиҳатларидан максимал равишда фойдаланишни билади. Пеп эса футболчиларни ўсишида катта роль ўйнайди, уларнинг амплуаларини ўзгартиради, майдонда ҳаракатланиш борасида кўрсатмалар беради ва тезроқ фикрлашга ундайди. Унинг қўл остида ўзи шундоқ ҳам топ футболчи бўлган Лам ёки Левандовски тўпга эгалик қилишда ёки жамоавий ҳаракатларда ўсишга эришди. Ёш Эрлинг эса ҳали кўп жиҳатларда ўсиши керак, ўса оладиган салоҳиятга эга. Испаниялик мураббий уни дунёнинг энг идеал ҳужумчисига айлантириши мумкин!

3) У "Сити"да АПЛ асосий юлдузига айланиши мумкин

Англияга ўзининг Месси, Неймар ёки Левандовскиси етишмаяпти. Асосий юлдузлар Де Брюйне ва Кейн деб оладиган бўлсак, медиа оламида уларга талаб у қадар юқори эмас. Холланд туманли альбионга кўчиб ўтиши биланоқ биринчи планга чиқиши аниқ! Сабаби бу мавсум футболчи улкан маркетинг салоҳиятига эгалигини кўрсатиб берди – мисол учун “Севилья" посбони билан "можаро" ёки бир қанча шов-шувли интервьюлар. Қўшимчасига Британияда форвард топ-рақибларга қарши кўпроқ майдонга тушади ва бу ҳамма учун фойдали бўлади.

4) "Ман Сити"га ҳам ҳозир Эрлинг жуда зарур

"Шаҳарликлар" таркибида ҳужумларни якунлай оладиган топ, соф ҳужумчи кўринмаяпти. Агуэро бутун йил давомида даволаниш билан оввора эди, Жезус ва Стерлинг эса баъзида 100% имкониятларни кўкка совуришмоқда ҳамда бу баъзида ЕЧЛда панд бериб қўймоқда. Ўтган мавсум "Лион"га қарши ўйин сўнгида Рахим қулай имкониятдан унумли фойдалана олмагани ва инглизлар мусобақани тарк этгани футбол мухлисларининг ёдидан кўтарилмаган бўлса керак. Норвегиялик бу муаммони ҳал қила олади – ҳужумда Холанд билан "Сити” деярли кучсиз нуқтаси йўқ жамоага айланади! "Реал"да Зиданнинг ёқимтойи Бензема бор ва охирги йилларда "Реал Мадрид"га не-не  ҳужумчилар келиб кетмади дейсиз. Эрлинг Испанияга йўл олса,  камида Карим билан тил топишишига тўғри келади.

5) Эрлингга руҳан Манчестер кўпроқ мос келади

"Шаҳарликлар” сафида вақтида футболчининг отаси Альф-Инге тўп тепган ва мухлислар уни илиқ хотиралар билан эслашади. Шунингдек, "Сити"да асосий бўлишга интилувчи юлдузлар деярли йўқ. Эрлинг у ерда ҳақиқий афсонага айланиши, клуб тарихидаги  ва вақт ўтиши билан АПЛ тарихидаги энг яхши тўпурарга айланиши мумкин. "Реал" тарихидан жой олиш эса норвегияликка қийинлик қилса керак. Сабаби Роналдуни қувиб ўтиш (ҳеч бўлмаса, унга етиш) деярли имконсиз, клубга эса мунтазам равишда янги-янги юлдузлар келади ва Холанд Мадридда "зўрларнинг бири" бўлиб қолаверади.

"Реал Мадрид"га ўтиш учун сабаблар
1) Зиданнинг футболи норвегиялик учун жуда мос тушади

Эрлингнинг устун жиҳатлари бўш зоналарга эга бўлиш, ҳимоячилар ортидаги бўшлиққа катта тезликда очилиб, тўпни қабул қилишдир. "Реал"да эса бу ишни усталари жамланган. Фикримиз исботи сифатида, Винисиуснинг ЕЧЛ доирасида "Ливерпуль" дарвозасига урган голини эслаш кифоя. Тўпни олиб қўйиб, тезкор ҳужумлар, узоқ масофаларга тўп оширишлар - "қаймоқранглилар" ярим ҳимоясининг бу каби ҳислатлари Холандга катта ёрдам бериши турган гап. Бензема эса асосий ёрдамчи ролини қандай қойиллата олишини Роналду давридан яхши биласиз. "Сити"да эса Холанд ўз ўйинини бироз ўзгартириши, Гвардиоланинг ўзига хос футболига мослашиши талаб этилади. Шунда ҳам "Сити"да ўзини топиб кета олиши ва ҳозиргидек "ёндириши"га кафолат йўқ.

2) "Реал" учун "Янги Роналду" бўлиш 

Холанд - "Реал" уч йилдан буён топа олмаётган Криштианунинг идеал ўринбосари. Норвегиялик ҳам машғулотларда ўзининг янги қирраларини очишни хуш кўради ва майдонда етакчилик сифатларини ҳам кўриб улгурганмиз. Эрлинг "қаймоқранглилар"га мавсумдаги ўша ҳозирда етишмаётган 40 голни тақдим этади ва ҳужум чизиғидаги асосий фигурага айланади. Ўйин услуби, ҳаракатлари бўйича ўхшашликлари ҳам йўқ эмас - Холанд ҳам ажойиб тарзда бўш ҳудудларни излаб топади ва жарима майдончасига ёриб киради. Холанд Роналдунинг расмга тушишда унга унча ўхшамаган, ўзига хос версияси. 

3) "Реал"да Холанд титуллар ва индивидуал совринларга яқинроқ бўлади

Мадридда у ҳар йили қандайдир совринларни коллекциясига қўшиб қўя олади, лекин муросасиз АПЛда бундай кафолат ҳаттоки Гвардиолада ҳам йўқ. Кўрсатган каромати, қилган хизматлари бир хил бўлган тақдирда "Реал" вакиллари, мисол учун "Олтин тўп" учун овоз бериш жараёнида, "Ман Сити" футболчиларидан устунроқ қўйилади. Англияда энг яхши тўпурарлар мавсум давомида 20-25 та гол урса, Испанияда Эрлинг стабил равишда 30-40 та тўп кирита олади! 

4) Чемпионлардек фикрлаш ва етакчилик сифатларининг ўсиши

Мадридда жамоа ўзаги катта ғалабаларга эришган йигитлардан ташкил топган: Рамос, Модрич, Бензема ва бошқалар жуда кўп совринларни бошлари узра кўтаришган. Ва улар Холанд билан айнан шу тажрибаларини бўлишишади. Янги "Реал" норвегиялик атрофида қурилиши ҳам ҳеч гап эмас. "Сити"да эса Эрлинг жамоавий тизимнинг кичик бир детали бўлади холос. "Қироллик клуби”да индивидуал маҳоратга доимо алоҳида эътибор бериб келинган ва шундай жамоа сенинг атрофингда қурилса – бу улкан обрў ҳисобланиши аниқ!

5) Флорентино Перес

"Манчестер Сити"нинг ҳозирги лойиҳасини Гвардиола бошқармоқда. Бироқ мураббий яна қанча жамоада қолиши аниқ эмас. Пеп кетгач, "шаҳарликлар"нинг ишлари қандай ривожланади ҳеч ким аниқ айта олмайди. Бироқ дон Флорентинони яқиндагина қайта сайлашди ва у камида 2025 йилгача "Реал"да қолади. УЕФА билан можаро ва ташкилотнинг Перес президентликдан кетишини исташигина, тажрибали Флорентино курсисини бўшатиб қўйишига сабаб бўла олмайди. Яқинда клубнинг стадиони қайта қуриб битказилади. Шунингдек, жамоага Килиан Мбаппе олиб келиниши ҳақида гаплар борган сари баландроқ янграмоқда. Мабодо франциялик футболчи Испания пойтахтига кўчиб ўтмаса ҳам, Холандни доим кучли жамоадошлар қўллаб туришига шубҳа қилмасак бўлаверади.

Хўш, "Championat.asia"нинг қадрли ўқувчилари, сизнинг фикрингиз қандай? Эрлинг фаолиятини қаерда давом эттиргани яхшироқ?

Нозима Зарипова таржимаси