Ўзбекистонлик қанот ҳакамлари ФИФА семинарида иштирок этади

2015 йилнинг ноябрь ойида бўлиб ўтган ФИФА ҳакамлар қўмитаси мажлисида 2018 йили Россияда ўтказиладиган Жаҳон чемпионатида ишлаши мумкин бўлган ҳакамлар саралаб олинган эди. Футбол оламидаги энг нуфузли турнирга муносиб тайёргарлик кўриш мақсадида ФИФА қанот ҳакамлари учун махсус ўқув-семинарларини ўтказади.

Ушбу семинар Марокашнинг Агадир шаҳрида, 23 — 27 май кунлари бўлиб ўтади. Унда ОФКга аъзо мамлакатлардан жами 14 нафар қанот ҳакамлари иштирок этади.

Аввалроқ, Абдуҳамидулло Расулов ҳамда Жаҳонгир Саидов билан бир бригадани ташкил қиладиган ФИФА рефериси Равшан Эрматов ҳам шу йилнинг 11— 15 апрель кунлари ташкил этиладиган ФИФАнинг Жаҳон чемпионатида ишлаши кутилаётган номзод бош ҳакамлар учун семинарида иштирок этиши ҳақида ҳам хабар берган эдик.