Ўзбекистонлик ҳакамлар «Suzuki Cup» баҳсларида ишлайдилар

ASEAN минтақасининг жами 8та терма жамоаси иштирок этадиган мазкур турнирда Коваленко бригадаси иккита ўйиндан иборат финал учрашувинининг илк ўйинини бошқаради. Финалнинг илк ўйини 17 декабрь куни бўлиб ўтса, жавоб баҳси 20 декабрь куни ўтказилади. Илк ўйинда Коваленкога қанотларда Маъмур Саидқосимов ҳамда Жаҳонгир Саидовлар ёрдам беришади. Ўзбекистонлик яна бир ФИФА рефериси Владислав Цейтлин эса учрашувда захира ҳаками сифатида ишлайди.

Таъкидлаш жоиз, «Suzuki Cup» турнирининг гуруҳ ўйинларида ўзбекистонлик яна бир ФИФА рефериси - Ильгиз Танташев ҳам ҳакамлик қилади. Тантаншев мусобақанинг гуруҳ босқичи ўйинларида ўз ёрдамчиси Руслан Серазетдинов билан учрашувларни бошқаради.

Маълумот ўрнида, «Suzuki Cup» турнирида бу йил жами 8та терма жамоа икки гуруҳга бўлинган ҳолда иштирок этадилар. Айни дамда мазкур мусобақада иштирок этувчи 6та терма жамоанинг номи маълум - Вьетнам, Филиппин, Индонезия, Сингапур, Малайзия ва Таиланд терма жамоалари. Яна иккита терма жамоа эса, саралаш баҳслари якунига етгач маълум бўлади. Турнир ўйинлари 22 ноябрь куни старт олса, мусобақанинг ярим финал ва финал баҳслари қисқа муддатлик танаффусдан сўнг 17 ва 20 декабрь кунлари ўтказилади.