Ўзбекистон U-19 ёшлар термаси Қатардаги илк машғулотларни ўтказди

Алексей Евстафеев қўл остидаги Ўзбекистон U-19 ёшлар терма жамоаси шу куннинг ўзида мусобақа доирасидаги илк машғулотларини ўтказди.

«А» саралаш гуруҳи доирасида Қатарда меҳмон бўлиб турган бошқа терма жамоалар – Ҳиндистон, Непал ва Туркманистон ёшлари каби Ўзбекистон U-19 термаси ҳам Доҳадаги беш юлдузли Wyndham Grand Regency меҳмонхонасида жойлашган. Терма жамоанинг 2 октябрь, чоршанба куни ўтказилган машғулотлари ушбу меҳмонхонадан 20 дақиқалик масофада жойлашган Қатар Футбол уюшмаси Техник қўмитасига қарашли машғулот майдонларида ўтказилди.

Ўзбекистон U-19 ёшлар терма жамоаси 2 октябрь куни Тошкент – Дубай – Доҳа йўналиши бўйлаб, «Ўзбекистон ҳаво йўллари» ва «Emirates» авиакомпаниялари рейслари орқали парвоз қилиб, Қатар пойтахтига етиб келди. Бош мураббий Алексей Евстафеев, ёрдамчи мураббий Сергей Андреев ва дарвозабонлар мураббийи Алексей Рошин назорати остида ўтказилган машғулотларда футболчилардаги айнан йўл чарчоғини чиқаришга асосий эътибор қаратилди, асосан енгил чигалёзди машқлар ўтказилди.

Қатардаги «А» саралаш гуруҳи ўйинлари 4 октябрь куни старт олади. Ўзбекистон ёшлари дам оладиган 1-турда Непал Туркманистонга қарши, Ҳиндистон эса саралаш баҳслари мезбони Қатарга қарши майдонга тушади. Евстафеев шогирдлари эса саралашдаги юришини 6 октябрь куни, Туркманистонга қарши ўзига хос «Ўрта Осиё дербиси» билан бошлайди.

Эслатиб ўтамиз, Ўзбекистон U-19 ёшлар терма жамоаси бош мураббийи Алексей Евстафеев сараалш баҳсларига 23 нафар футболчини жалб этган.