Ўзбекистон МТЖ "Navruz Cup"га тайёргарликни бошлади + Шерзод Темировдан интервью

"Локомотив" стадионида ўтган машғулотдан олдин "Персеполис"га кўчиб ўтган Шерзод Темиров интервью берди.

"Персеполис"га ўтиш ҳақида...

— "Персеполис" Осиёнинг энг кучли жамоаларидан бири саналади. Мен учун таклифни ўйлаб ўтиришга ҳам ҳожат бўлмади. Қониқарли битим таклиф қилишгани, шунингдек, клуб раҳбарияти ҳамда мураббийи хоҳиши билдиргани учун жамоа сафига бориб қўшилдим.

Эрон клубига мослашиш қийин бўлмадими? 

— Жамоадаги кўпчилик футболчининг ёши катта. Улар мени яхши қарши олишди ҳамда мослашишим учун ёрдам беришмоқда. Ўз ўйиним билан уларнинг ишончини оқлашга ҳаракат қиламан.  

Терма жамоага илк бор легионер сифатида чақирилдингиз. Ҳиссиётлар қандай? 

— Терма жамоага чақирувдан кейинги ҳиссиётлар ҳақида гапиришга тил ожиз. Умумий иккинчи, легионер сифатида илк бор чақирув олдим. Худо хоҳласа, устозларим ишончини оқлашга ҳаракат қиламан. 

"Navruz Cup" мусобақасидан нималар кутяпсиз?

— Намангандаги турнирда яхши иштирок этишга ҳамда келгусида юртимиз байроғини юксакка кўтариб, терма жамоа билан жаҳон чемпионатига чиқиш учун бор имкониятимизни ишга соламиз.