Осиё Кубоги-2019. "F" гуруҳи мураббийлари

Қуйида энг охирги гуруҳ - "F" гуруҳи жамоалари мураббийларини таништириб ўтамиз. Маълумки, бу гуруҳдан Ўзбекистон терма жамоаси ҳам ўрин олган.

"F" гуруҳи - Япония, Ўзбекистон, Уммон, Туркманистон.

Хажиме Мориясу (Япония бош мураббийи)
Туғилган санаси: 23 август, 1968 й.

Ўз вақтида 14 йил "Санфречче Хиросима" клубида тўп тепган ушбу мураббий Японияни қитъа чемпионатига жиддий тайёрлашга ҳаракат қилмоқда. У мундиалдан кейин терма жамоани қабул қилиб олганидан бери "самурайлар" бешта ўйинда мағлубиятга учрашмади. Япония бу мураббий билан бешинчи бор Осиё Кубогини ютишга бел боғлаган.

Эктор Купер (Ўзбекистон бош мураббийи)
Туғилган санаси: 16 ноябрь, 1955 й.

Ўзбекистон миллий терма жамоаси ҳам хорижлик мураббийга эга бўлди. ЖЧ-2018да Миср термасини бошқарган 63 ёшли Эктор Купер ҳозирда ватанимиз терма жамоасига мураббийлик қиляпти. У билан 3+1 кўринишда шартнома имзоланган. Бунгача Купер уч йил Миср термасини бошқарган.

Пим Вербек (Уммон бош мураббийи)
Туғилган санаси: 12 март, 1956 й.

62 ёшли голландиялик мутахассис Уммон терма жамоаси бош мураббийи сифатида ишлаб келмоқда. Унинг қўл остида яхши жамоа шаклланаётганидан хабаримиз бор. Ушбу мураббий билан Жанубий Корея Осиё Кубоги-2007да учинчи ўринни олганди. Ўтган йил эса Уммон билан Кўрфаз Кубогида зафар қучган.

Язгули Хожагелдиев (Туркманистон бош мураббийи)
Туғилган санаси: 16 февраль, 1977 й.

Туркманистон терма жамоаси устози ҳақида кўп маълумотга эга эмасмиз. Фақат шуни айтиш мумкин, 41 ёшли мутахассис "Олтин Аср" клубида ҳам бош мураббий бўлиб ишлайди. Маълумки, "Олтин Аср" шу мавсум ОФК Кубогида иккинчи ўринни эгаллади.