Осиё Кубоги-2015 саралаш босқичи. “С” гуруҳига назар

16:35. Хитой – Индонезия
21:30. С.Арабистони – Ироқ

Гуруҳда Саудия Арабистони термаси 9 очко билан пешқадамлик қилмоқда. Иккинчи ўринда бораётган Хитой ҳисобида 4 очко бор. Ироқ эса 3 очко билан учинчи ўринни эгаллаб турган бўлса, охирги ўриндаги Индонезия ҳисобида 1 очко мавжуд.

Фу Бо (Хитой термаси бош мураббийи): “Биз бу ўйинга тайёргарликни 6 ноябрь куни бошлагандик. Фақат 10 ноябрдан тўлиқ таркиб билан шуғулланишни бошладик. Эътиборни асосан жамоавий ўйинга қаратдик. Йигитларни имтиҳондан ўтказдик ва уларнинг кўрсаткичлари менга маъқул келди. Ҳозирча бор эътибор Индонезия билан ўйинга қаратилган, ана ундан кейин Саудия ҳақида ўйлаймиз”.
 
Жэксен Тиаго (Индонезия бош мураббийи): “Мана, икки ҳафтадирки бўлажак учрашувга тайёргарлик кўряпмиз. Албатта, сафарда Хитойга қарши тўп суриш осон эмас, лекин биз ижобий натижадан умидвормиз. Бу ерга 24 нафар футболчи билан ташриф буюрдик ва уларнинг ҳаммаси майдонга тушишга ҳозир. Қолаверса, иқлимга ҳам мослашиб олдик. Мақсадимиз уйга очко билан қайтиш ва бунинг учун бор имкониятни ишга соламиз”.

Лопес Каро (С.Арабистони термаси бош мураббийи): “Ҳозирча ўтказилган учта ўйиннинг ҳаммасини ғалаба билан якунладик. Агар бу сафар ҳам Ироқдан устун келсак, Осиё Кубогига чиққанимизни байрам қиламиз. Ироқ – кучли жамоа, ахир улар 2007 йил Осиё чемпиони бўлишган. Уларни мағлубиятга учратиш осон бўлмайди, аммо мен шогирдларимга ишонаман”.

Ҳаким Шакир (Ироқ термаси бош мураббийи): “Агар гуруҳдан чиқишни истасак, сафарда тўп суришимизга қарамай, Саудияни енгишимиз шарт. Бу ўйинда ким ғалаба қозонса, кўплаб имкониятларга эга бўлади. Агар биз зафар қучсак, иккинчи ўринни олишга яқин бўламиз, мабодо Саудия ғалаба қозонса, улар чемпионат йўлланмаси қўлга киритилганини байрам қилишади. Маълумки, Саудия ўз уйида кучли ўйин кўрсатади, аммо бу бизни хавотирга солаётгани йўқ”.

Хайрулла Холиқов тайёрлади.