Осиё футболи ҳақида билишимиз керак бўлган маълумотлар

Албатта, Осиёда футболни ёритиш даражаси Европага таққослаганда унчалик зўр бўлмаслиги мумкин. Европада ва айниқса кучли бешлик миллий чемпионатларида футбол аллақачон шоу даражасига чиқиб бўлган. 

Лекин Осиё ҳам ортда қолмасликка ҳаракат қиляпти ва йилдан йилга жамоалар, футболчилар ҳамда лигалар бўйича янада кўпроқ маълумотга эга бўлиб боряпмиз. Шу ўринда қитъа футболига оид билишимиз керак бўлган қизиқарли савол-жавобларни келтириб ўтамиз. 

Савол: Осиё чемпионлар лигасида барча даврларнинг энг яхши тўпурари ким?

Жавоб: Жанубий Кореялик ҳужумчи Ли Донг Гук. Унинг голлари сони 37тани ташкил қилади. Ли Донг Гук ОЧЛдаги охирги голини 2019 йил "Чонбук" сафида "Бейжинг" дарвозасига киритган. 

Савол: Бу қайси стадион?

Жавоб: Бу Жакартадаги "Бунг Карно" стадиони бўлиб, сиғими 62,198 томошабинга мўлжалланган. 

Савол: Осиё Кубоги биринчи марта қачон ва қаерда ташкил қилинган?

 Жавоб: Осиё Кубоги илк бор 1956 йил Гонконгда ўтказилган бўлиб, бунда тўртта жамоа иштирок этган ва якунда Жанубий Корея ғолибликни қўлга киритган. 

Савол: ОЧЛда ғолиб бўлган Австралиянинг дастлабки клуби қайси?

Жавоб: "Вестерн Сидней". Бу клуб 2012 йил ташкил топган бўлишига қарамай, 2014 йил ОЧЛ финалига қадар бориб ҳал қилувчи баҳсда Саудия Арабистонининг "Ал Ҳилол" клубидан устун келган. Австралияда "Вестерн" футболчилари 1:0 ҳисобида зафар қучиб, сафарда 0:0 ўйнашган. 

Савол: Сон Хёнг Мин АПЛдаги илк голини қайси жамоага урган?

Жавоб: "Кристал Пэлас"га. 2015 йилнинг 28 август куни "Тоттенхэм" сафига қўшилган Сон Хёнг Мин АПЛдаги илк голини 20 сентябрь куни "Кристал Пэлас" дарвозасига киритган. Бу ўйиндаги ягона гол бўлган.

Савол: Аёллар ўртасида ким энг кўп "Осиёнинг энг яхши футболчиси" деб топилган?

Жавоб: Айа Мияма. У уч марта (2011, 2012, 2015) йиллари "Осиёнинг энг яхши футболчиси" дея тан олинган. Айа Мияма Япония аёллар терма жамоаси сардори сифатида 2015 йилги жаҳон чемпионатида жамоасини финал сари етаклаб якунда кумуш медалларга эга чиққан. 

Савол: Алмуаз Али эронлик ҳужумчи Али Дайининг рекордини янгилаш учун Осиё Кубогида нечта гол урган?

 Жавоб: 9та. Қатар терма жамоаси ҳужумчиси Осиё Кубоги-2019 гуруҳ босқичининг ўзидаёқ 7та гол урди. Ярим финалда БАА дарвозасига тўп киритиб голлари сонини 8тага етказиб олган ҳужумчи финалда ҳам ўзини кўрсатишга эришди.