Олмалиқда туғилган футболчи Германия терма жамоасига чақирилди

Германия U21 терма жамоаси 2 сентябрь куни Словакия билан ўртоқлик учрашуви, 6 сентябрь куни эса финляндияликларга қарши U21 Европа чемпионати саралаш учрашуви ўтказади. Германия футбол федерацияси ушбу ўйинларга чақирилган футболчилар рўйхатини эълон қилди.

Бунинг эътиборли жиҳати шундаки, Германия U21 терма жамоасига илк маротаба чақирилганлар орасида биз олдинроқ эълон қилган - Олмалиқда туғилган Антон Валдемар ҳам бор. Антон айни дамда "Ганновер" клуби шарафини ҳимоя қилади. 20 ёшли футболчи 2015 йилда ушбу немис клуби билан профессионал шартнома имзолаган эди.

Германиялик ёшлар айни дамда Европа чемпионати саралашининг еттинчи гуруҳида биринчи ўринни эгаллаб турибди. 21 ёшгача бўлган футболчилар ўртасидаги Европа чемпионати 2017 йил (16-30 июнь кунлари) Польшада бўлиб ўтади.