Олег Зотеев қайси клубга кетаётгани маълум бўлди

Championat.asia сайти маълумотига кўра, Зотеев Жанубий Кореянинг "Чоннам Драгонс" клубига кўчиб ўтмоқда. Ушбу клуб К2 лигада иштирок этади. Кеча ҳимоячи чартер рейсда Кореяга учиб кетди. Июнь ойи сўнггида Кореяда ёзги трансфер ойнаси очилади ва мана шу муддатга қадар Зотеев 14 кунлик карантинда бўлади.

Маълумот учун, "Чоннам Драгонс" 1994 йил ташкил этилган. Клуб ўз тарихида уч бор Жанубий Корея футбол Ассоциацияси кубоги соҳибига айланган. Ўз уй ўйинларини 13496 томошабинга мўлжалланган "Gwangyang Football Stadium" ўйингоҳида ўтказиб келади. Айни пайтда жамоада маҳаллий мутахассис Жон Кюнг Жун бош мураббий ҳисобланади. 2019 йилги мавсумда "Чоннам" К2 Лигада 6-ўринни эгаллаган эди. Бу мавсум клуб 5та ўйинда 7 очко тўплаб мусобақа жадвалининг 5-поғонасида бормоқда. Ҳозирги кунда "Чоннам" сафида икки нафар легионер бор: бразилиялик Родолфо ва норвегиялик Юлиан Кристофферсен.

Эслатиб ўтамиз, айни пайтда Жанубий Корея К лигасида Икром Алибоев, Рустам Ашурматов, Жамшид Искандаров ва Достонбек Турсунов каби легионерларимиз фаолият олиб боришмоқда. К2 лигада эса ўзбекистонлик Хуршид Ғиёсов ўйнамоқда.

Олег Зотеев 1989 йил 5 июль куни туғилган. 2010-2012 йилларда "Олмалиқ" (ҳозирги АГМК) клубида фаолият олиб борган. 2013-2014 йилларда Тошкентнинг "Бунёдкор" клубида ўйнаган. 2015 йил бошидан буён "Локомотив" шарафини ҳимоя қилиб келаётган эди. У Ўзбекистон терма жамоасида ҳозирга қадар 24та учрашувда майдонга тушиб 1та гол уришга муваффақ бўлган.