ОКМК Ўзбекистон олимпия терма жамоаси футболчисини трансфер қилди
16 jan 2024 23:16
News

ОКМК Ўзбекистон олимпия терма жамоаси футболчисини трансфер қилди

Яйпаннинг «Турон» жамоасига тегишли бўлган, Тошкентнинг «Олимпик» жамоасида тўп тепган Асадбек Раҳимжоновнинг трансфер хуқуқини ОКМК футбол клуби тўлиқ сотиб олди.

ОКМК ва футболчи ўртасида 3 йиллик шартнома имзоланди.

Таъкидлаш лозимки, Асадбек Раҳимжонов Ўзбекистон Олимпия терма жамоасига номзод. Шунингдек, футболчи Хитойда 19-бор ўтказилган Осиё ўйинлари мусобақасининг бронза медали совриндори ҳисобланади.

Хабарингиз бор, Ўзбекистон Олимпия терма жамоаси Париж олимпиадаси йўлланмасини қўлга киритиш учун Осиё чемпионатида қатнашади. Айнан мана шу мусобақаларга пухта тайёргарлик кўриш учун Асадбек Раҳимжонов бўлажак мавсумни ҳам «Олимпик» жамоасида ижара асосида бошлайди. Кейинчалик эса футболчи ОКМК футбол клубига қайтади.

Асадбек Раҳимжонов 2004 йил 17 февраль санасида таваллуд топган. Майдондаги жойлашуви - марказий ҳимоячи. Футболчи Суперлиганинг 2023-йилги мавсумида «Олимпик» сафида умумий 20 ўйинда майдонга тушиб, 1456 дақиқа ҳаракат қилган.