ОФК инструктори Урганчда

Жорий йилнинг 8 февралидан 21 февралигача давом этадиган мазкур курсда 21 нафар хоразмлик мураббий  таҳсил олмоқда. Ўқув-машғулотлар жараёни вилоят марказидаги 5-сон футболга ихтисослашган мактаб-интернат базасида ташкил этиляпти. Ўз навбатида тингловчилар ОФК инструктори Зойир Ҳасанов раҳбарлигида кунига икки мартадан назарий ва амалий машғулотларни маромига етказишмоқда. Хоразм вилояти футбол федерацияси мутахассиси Эркин Қадамов координатор сифатида инструкторга ёрдам бераётир. Курснинг эътиборга молик томони шундан иборатки, уни тугатган мураббийлар нафақат “С” халқаро сертификати, шунингдек мураббийлар учун белгиланган атестациядан ўтганлиги тўғрисида сертификатга ҳам эга бўлишлари мумкин.

- Ўқув-машғулотларимиз юқори савияда ташкил этилаётир, - дейди ОФК инструктори З. Ҳасанов. -  Икки ҳафталик курс давомида тингловчиларимиз янги технологиялар асосида  сабоқ олишади. Ишончим комилки, келгусида курсни тамомлаган мураббийлар бу ерда эгаллаган малака ва кўникмаларини ёш футболчиларга ўргатишади. Кези келганда, курс ишини ташкил этишда ва уни ўтказишда яқиндан кўмаклашаётган Хоразм вилояти ҳокимлиги, вилоят футбол федерацияси ва 5-сон футбол мактаб-интернати раҳбариятига самимий миннатдорчилигимни билдираман.

Икром  ХУДОЙБЕРГАНОВ.