ОЧЛ. “Ал Шабаб” – “Кашива Рейсол” (2:2) ўйинидан кейинги фикрлар

Натижада ҳар иккала ўйин натижасига кўра “Кашива Рейсол” ОЧЛнинг ярим финалига йўл олди.

Нелсиньо Баптиста (“Кашива Рейсол” бош мураббийи): - Биз катта натижага эришдик. Ярим финалга чиққанимиздан хурсандмиз. 2009 йилдан буён Япония клуби мусобақанинг ярим финалига қадар етиб келмаётганди. Биз эса буни уддаладик. Албатта, ўтказиб юборилган тезкор гол ўз таъсирини кўрсатди, бироқ шогирдларим тезда ўзларига келиб олишди. Иккинчи таймда тўпни кўпроқ назорат қилдик. Ҳатто ҳисобда олдинга чиқиб олдик. Лекин майдон эгалари яна тўп кирита олишди. Ғалаба қозонмаган бўлсак-да, дуранг бизни ярим финал сари етаклади.

Мишель Прюдом (“Ал Шабаб” бош мураббийи): - Жуда қийин ўйинни ўтказдик. Ҳисобни очган бўлишимизга қарамай, ғалаба қозона олмадик. Тан олиш керак, бугун ҳар томонлама шаклланган кучли рақибга қарши тўп сурдик. Япон клуби анча тартибли ўйин намойиш этди. Иккита гол урдик ва шунча ўтказиб юбордик. Лекин биз эмас, рақиб ярим финалга йўл олди. Бу эса жуда алам қиляпти. Аммо шогирдларимга ҳеч қандай эътироз йўқ.