"Навбаҳор": Тарбияланувчиларимиз ғалаба билан бошлашди

“С” гуруҳида “Навбаҳор” футбол клуби қошида фаолият юритаётган “Навбаҳор-Умид” футбол мактаби тарбияланувчилари “Навбаҳор” шарафини ҳимоя қилишади. Гуруҳда тарбияланувчиларимизга “Нефтчи” (Фарғона), “Металлург” (Бекобод), “Олмалиқ” (Олмалиқ) ва “Қўқон-1912” (Қўқон) клубларидаги тенгқурлари рақиблик қилишади.

Дастлабки турда тарбияланувчиларимиз “Металлург” жамоаси билан баҳс олиб боришди. Намангандаги “Марказий” ўйингоҳда бўлиб ўтган учрашувда ёш футболчиларимиз 4:1 ҳисобида ғалаба қозонишди. Ўйиннинг 14-дақиқасида Камолиддин Мирғиёсов ҳисобни очишга эришди. Бўлим якунланиши арафасида Абдулазиз Жалилов чап қанотдан ошириб берилган тўпни боши билан дарвозага йўллаб, ғалабани мустаҳкамлади. Танаффусдан кейин бекободлик ёшлар ҳаракатида фаоллик кўзга ташланди. Бу ҳол 59-дақиқада ҳисобдаги фарқни қисқаришига олиб келди. Бобир Абдумажидов ёшларимиз дарвозасини нишонга олди. Орадан ҳеч қанча вақт ўтмай Жасурбек Баҳодиров ўнг қанотдан олдинга интилиб, олис масофадан бурама зарба йўллаб ҳисобни 3:1 кўринишига келтириб қўйди. 73-дақиқада эса Исломбек Каримов ўйиндаги якуний натижани 4:1 кўриниш ҳосил қилишини таъминлади.

Дастлабки турнинг иккинчи учрашувида “Олмалиқ” ўз майдонида “Қўқон-1912” жамоасини қабул қилади. “Нефтчи” жамоаси эса биринчи турда дам олди. 2-турдан ўрин олган ўйинлар 14 июнь санасига белгиланган. Шу куни ёшларимиз Фарғонада “Нефтчи” клуби меҳмони бўлишади. “Металлург” эса “Олмалиқ” жамоасини қабул қилади. Гуруҳ босқичи 23 август куни якунига етади.

Олий лига тайёрлов гуруҳлари биринчилиги. "С" гуруҳи. 1-тур.
“Навбаҳор” – “Металлург” – 4:1 (2:0). 7 июнь. Наманган. “Марказий” ўйингоҳ.
Ҳакамлар: М.Мажидов, Р.Одилов, Р.Галиев, М.Маматхонов.
Голлар: К.Мирғиёсов (14), А.Жалилов (39), Ж.Баҳодиров (61), И.Каримов (73) – Б.Абдумажидов (59).
Огоҳлантиришлар: К.Абдусаломов (69), Ж.Нурматов (79, иккаласи ҳам “Металлург”).