"Насаф" Муборакда ҳам гол ўтказмасдан ғалаба қозониш сериясини давом эттира оладими?

16:00 - “Машъал” (Муборак) – “Насаф” (Қарши)

Ҳакамлар: И. Танташев (Бухоро), Ҳ. Шодмонов (Бухоро), А. Қўлдошев (Бухоро), Ф. Норсафаров (Қарши).

Назоратчи: С. Нажафалиев (Тошкент).

ПФЛ вакили: Б. Ҳайдаров. 

Демак, бугун Муборак шаҳридаги Баҳром Вафоев номли стадионда воҳа дербиси кузатилади. Турнир жадвалининг 8-поғонасида бораётган "Машъал" иккинчи ўрин учун курашаётган "Насаф"га қарши баҳс олиб боради. 

Иккинчи даврада ҳозирча тўртта ғалабага эришган "Машъал" охирги турларни яхши ўтказа олмади. Жамоа сафрада "Қўқон-1912"ни мағлуб этиб қайтганидан бери кейинги тўртта учрашувда ғолиб чиқмади. "Машъал" ўз майдонида икки бор дуранг ўйнаган бўлса, сафардаги иккита беллашувда ютқазиб қўйди. 

Биласизми? "Машъал" ўз майдонида "Сўғдиёна" ва "Бухоро" билан дуранг қайд этди. Бу жамоа охирги марта 20-турда Муборакда зафар қучган ва ўшанда "газчилар" "Навбаҳор"дан 2:1 ҳисобида устун келишган. 

Факт: "Насаф"га қарши Қаршидаги беллашувда муборакликлар 0:1 ҳисобида ютқазиб қўйишган. Ўтган йил Муборакда кечган учрашувда эса "Машъал" рақибини 1:0 ҳисобида мағлуб этган. 

"Насаф" ҳақида тўхталадиган бўлсак, бу жамоа иккинчи ўрин курашмоқда. Чемпионликка имконият йўқлиги бор гап, чунки буёғига "Локомотив" пешқадамликни асло топшириб қўймаса керак. Лекин "Насаф" иккинчи ўринни оладиган бўлса, бу ҳам қаршиликлар учун катта ютуқ бўлади. "Насаф" олдида бир қатор муҳим ўйинлар турибди ва шулардан бири бугун ўтказилади. 

Биласизми? "Насаф" иккинчи даврада жуда чиройли ўйин намойиш этмоқда. Буни мураббий ва мутахассислар ҳам бот-бот таъкидлашяпти. "Насаф" охирги еттита ўйинни гол ўтказмасдан ўз фойдасига ҳал этди ва буни жудаям яхши кўрсаткич деса бўлади. 

Факт: "Насаф" ўз майдонида "Бунёдкор"га мағлуб бўлганидан бери кейинги баҳсларнинг ҳаммасини ғалаба билан якунлади. Бундан ташқари, жамоа охирги иккита ўйинида бир хил 3:0 ҳисобида ғалабага эришди. "Нефтчи" - "Насаф" 0:3, "Насаф" - "Динамо" 3:0. 

Агар бугун "Машъал" ғалаба қозонса ёки гол уришнинг уддасидан чиқса, "Насаф"нинг кетма-кет еттита ўйинлик сериясига барҳам беради.