"Наполи" ва "Милан"нинг ғалабалари, Италия чемпионатидаги натижалар

А Сериянинг ортда қолган тури ҳақида Сергей Румянцев ёзади.

"НАПОЛИ" КАЛЬЯРИДА ҒАЛАБАГА ЭРИШДИ

Пайшанба куни "Лейпциг"га қарши ўйиндан кейин Сардинияга ташриф буюрган "Наполи" ғалаба қозонган бўлса-да, Европа лигасини тарк этди. Сарри жамоасида муаммолар борга ўхшади. Бироқ илк дақиқалардан неаполликларнинг ўйинда фаворит эканлиги яққол кўзга ташланди. "Наполи" тезда гол уришга эришди. Кейинчалик меҳмонлар бироз темп тушган вақтда яна бир тўп киритди. Аллан қанотдан тўпни Кальехонга оширди, жарима майдончаси ичида бўлган тартибсиз ўйин натижасида гол киритилди. "Наполи"нинг учинчи голи жуда чиройли бўлди. Комбинацияда барча 11 футболчи иштирок этди. Инсинье эса Гамшикка гол уриш имкониятини яратди. Кўп ўтмасдан Лоренцо Инсиньенинг ўзи ҳам пенальтидан гол киритди. Сўнгги дақиқаларда Руй ҳам гол уриб, якуний нуқтани қўйди. Португалиялик футболчи учун бу гол сўнгги уч учрашувдаги иккинчи голидир. "Наполи" А Серияда кетма кет 10-ғалабасини қўлга киритди. Жамоа Европада ички чемпионатда ғалаба қозониш бўйича 2-ўринда бормоқда. Сарри шогирдларининг олдида 12 финалга тенг баҳслар борлигини ҳисобга олсак, ҳали барчаси олдинда.


"МИЛАН" "РОМА"НИ МАҒЛУБ ЭТДИ

Турнинг марказий баҳсида "Олимпико"да Рим ва Милан жамоалари ўзаро тўқнаш келди. Жаннаро Гаттузо жамоаси ЕЧЛда кураш олиб бораётган "Рома"га дарс ўтади. Икки жамоа ҳам ўтган ҳафтада еврокубокларда ўйин ўтказганди. "Милан"да эса тикланиш учун вақт камроқ эди. Римликларга эса ранг-баранглик етишмади. Патрик Шик Эдин Жеконинг ўрнига майдонга тушди. Женгиз Ундер эса кимларнингдир соясида қолиб кетмоқда. Биринчи бўлимда томонлар ёпиқ ўйин намойиш этишди. Иккинчи таймда эса бироз очиқроқ ўйин бўлди. "Рома"нинг хавфли ҳужумига меҳмонлар гол билан жавоб қайтаришди. Кутроненинг чиройли ва айёрона зарбасини Алиссон қайтара олмади. "Рома" ҳам олдинга ўтар, бироқ уларга якуний пас етишмаётганди. Ража Наингголан ва Лоренцо Пеллегрини ҳам "Милан"нинг ҳимоясини ёриб ўта олмади. 74-дақиқада "Рома" орқа чизиқдаги қўпол хато эвазига жазоланди. Калабрия илк бора гол уришга эришди. "Милан" 2011 йилдан кейин "Рома"ни биринчи марта сафарда доғда қолдирди.


"ИНТЕР" ҚИЙИНЧИЛИК БИЛАН ҒАЛАБАГА ЭРИШДИ

"Болонья" мағлуб этилганидан кейин Лучано Спалетти жамоасида қандайдир ўзгаришлар бўлиши мумкиндек эди. Бироқ  "нерадзурри"лар "Женоа"га ютқазиб қўйишди ва инқироз борасидаги гаплар яна давом этди. Ҳар бир очко учун жон-жаҳди билан курашаётган "Беневенто" қийинчилик эвазига доғда қолдирилди. "Интер" таркибида яна Мауро Икарди кўриниш бермади. Унинг жойини Эдер эгаллади. Биринчи бўлим ўта зерикарли ўтди. Меҳмонлар ҳимояда яхши ўйин кўрсатгани боис, "Интер" Пуджони дарвозаси олдида ҳеч қандай хавфли вазият ярата олмади. Агарда ўйиннинг бориши шундай бўлиб, Спалетти шогирдлари ғалабага эриша олишмаганида, жамоага яна танқидлар тоши отиларди. Яхшики, таркибда юқори савияли футболчилар жуда кўп. Милан Шкриньяр ҳаводан оширилган тўпни бош билан дарвоза тўрига йўллади ва А Серияда ўзининг тўртинчи голини киритди. 3 дақиқадан кейин миланликларнинг яна бир марказий ҳимоячиси Андре Раноккья ҳам рақиб дарвозасини ишғол этди. "Интер" 2018 йилда илк марта қуруқ ўйин ўтказди ва дерби учун яхши репетиция ўтказиб олди.


СПАЛ АУТСАЙДЕРЛАР УЧРАШУВИДА КУЧЛИРОҚ ЭКАНЛИГИНИ ИСБОТЛАДИ

"Кротоне" ва СПАЛ айни дамда А Серияда қолиш учун курашмоқда, интрига сўнгги тургача сақланиб қолади. "Беневенто"дан учралган мағлубият эса ҳали ҳеч нимани англатмайди. Учрашувнинг биринчи бўлимида СПАЛ гол урди. Жамоанинг энг кўр гол урган аъзоси Мирко Антенуччи имкониятдан унумли фойдаланди. Иккинчи бўлимда воқеалар ривожи тезлашиб кетди. Будимир ҳисобни тенглаштирди. Бироқ икки дақиқа ўтиб меҳмонларнинг янги аъзоси Симич гол урди. 9-дақиқа ўтиб, Палоски жамоасининг учун яна бир тўп киритди. "Кротоне" рақиб дарвозасини бир бор ишғол этган бўлса-да, бу ўйинни қутқариб қолиш учун етмади.


"ЛАЦИО" "САССУОЛО"НИ ДОҒДА ҚОЛДИРДИ

Ўтган турдаги ғалаба "бургутлар"га ишонч бахш этганди, "Сассуоло" ҳам бу учрашувга яхши кайфиятда ташриф буюрди. Бироқ 7-дақиқадаёқ ўйин тақдири деярли ҳал бўлди, деб айта оламиз. Ўша паллада Сергей Милинкович-Савич тўп киритишга эришди. "Сассуоло" деярли қаршилик кўрсатмади. Тўпурарлар пойгасида етакчилик қилаётган Чиро Иммобиле эса ўзи ишлаб олган пенальтини бажаришда қийналмади. Иккинчи бўлим бошида биринчи гол муаллифи дубль қайд этди. Ўйиндаги сўнгги гол шу вақтда киритилган бўлса-да, ўйин бироз қизиқарли кечди. "Сассуоло" лигада қолиш учун қаттиқ ҳаракат қилмоқда. Луис Алберто, Милинкович-Савич, Иммобиле яхши жисмоний ҳолатда, Андерсоннинг ҳам чиройли ўйин кўрсатаётганини таъкидлаш жоиз. "Лацио" шу кунги ўйинда нафақат куч, балки, ҳиссиётларни ҳам аямади. Чунки уларнинг олдида юқори мақсадлар қўйилган.

Шунингдек:

"Ювентус" - "Аталанта" учрашуви Туриндаги қорли об-ҳаво сабабли бошқа кунга қолдирилди.
"Сампдория" "Удинезе" устидан чиройли ғалабага эришди.
Валотининг дубли эвазига "Верона" "Торино"ни доғда қолдирди.