Мураббий жамоадан, футболчилар эса мураббийдан зериккан

Иккала томонда ҳам ўхшаш ҳолат. Клопп жамоаси мавсумни омадсиз тарзда ўтказмоқда, муаммо нимада эканлиги ҳам унчалик аниқ эмас, эҳтимол мураббий футболчилардан, футболчилар эса мураббийдан зериккандир. "Челси" бошқаруви Роман Абромовичдан америкаликларга ўтиб кетгач, клуб ҳалигача олдинги мавқейини тиклай олмаяпти. Трансферларга сарфланаётган миллионлардан ҳозирча наф йўқ. Мавсум аввалида жамоа бошқарувига келган Грем Поттер, вазият шу кетишда давом этса истеъфога чиқарилса керак. 

Эҳтимолий ўйин картинаси

Мезбонлар "Енфилд"да биринчи рақамли жамоа бўлиб ўйнашлари табиий, лондонликлар эса асосан қарши ҳужумлардан омадларини излашсалар керак. Жамоалар ўртасидаги сўнгги 4 ўйиннинг барчасида дуранг қайд этилгани, бугун бизни тенг ва қарама-қаршиликларга бой баҳс кутиб турганидан дарак.

"Ливерпул"да Маненинг кетиши ортидан ҳосил болган кемтик ҳалигача бўш турибди. Гол "машинаси" дея олиб келинган Дарвин Нунйеснинг ишлари ўхшамаяпти, ЖЧ кашфиётларидан бири Коди Гакпода мослашув жараёни кечмоқда. Клуб сўнгги 5 ўйинда 6 гол урган ва 9 бор ўтказиб юборган. Мерсисайдликлар ўртача бир ўйинда 1 гол билан кифоялинишмоқда, бу эса ҳужумкор ўйин услубига таянган жамоа учун қўрқинчли ҳолат. Юрген Клопп "Ливерпул"да ўзининг сўнгги мавсумини ўтказаётгандир эҳтимол. Ушбу масалада Грем Поттерга ҳам ҳавас қилиб бўлмайди. Бир Неча омадсиз ўйинлардан сўнг "Челси"да ишлаётган маҳаллий мураббийнинг "илдизлари"га "қурт" тушган.  Лондонликларда ҳам таркиб томонлама муаммолар бор. Фелиш дисквалификация сабаб ўйинни ўтказиб юборса, Фофана, Стерлинг, Пулишич, Рис Жеймс, Бен Чилвел каби футболчилар ҳали жароҳатидан фориғ бўлишмаган. Ҳужум чизиғидаги йўқотишлар фонида лондонликларнинг янги аъзоси, ЧЛ гуруҳ босқичининг энг тезкор футболчиларидан бири Михаил Мудрикда  Премьер-лигада дебют қилиш учун яхши имконият бор. Умуман олганда иккала жамоа ҳам оптимал таркибга эга эмас, шу томондан натижанинг қандай бўлиши кўпроқ мураббийларнинг тактик юришларига боғлиқ.

Кўрамиз ва кузатамиз...

Жалолиддин Халилов.