Муҳиддин Худоёров "Андижон"да

Аввал хабар бериб ўтганимиздек, самарқандлик Омад Тойлоқов билан Қаҳрамон Баҳодиров бугун клуб лагерига етиб келди.

Ундан ташқари яна бир янги футболчини учратиш мумкин. Бу дарвозабон Муҳиддин Худоёровдир.

Ўз вақтида "Бунёдкор" жамоасида тез танилиб ва тез йўқолиб қолган Худоёровни охирги пайтларда жароҳатлар қийнаб келаётганди. Шунинг учун, Муҳиддин маълум муддат майдон ташқарисида юришга мажбур бўлди.

Айтиш керакки, уни ўз вақтида миллий терма жамоамизга устозлик қилган Рауф Инилеев йиғинларга таклиф этиб синаб кўрганди.

Афтидан Азамат Абдураимов дарвозабонлар билан боғлиқ муаммони ушбу футболчи билан бартараф этмоқчи. Ҳозирча янги футболчилар кўрикдан ўтмоқда холос.

Клубга оид яна бир хабар, жамоани куни кеча Сардор Соибов тарк этган. Жорий мавсумни андижонликлар сафида бошлашни режалаштирган Соибов кутилмаганда, қарорини ўзгартириб Мурод Исмоилов бошқарувидаги "Нефтчи" машғулотларига бориб қўшилган.