Муҳаммад Одилов: “Зомин” бирдамлик эвазига вазифани бажарди”

Жорий йилда клуб сафида Муҳаммад Одилов ўзини ҳар томонлама кўрсатиб, тўпурарлар рўйхатини бошқариб турибди. Хўш, Одилов бунгача қайси жамоада ўйнагани ва “Зомин”да ўтказаётган фаолияти борасида нималар дейди? Буни суҳбатимиз жараёнида билиб олишингиз мумкин. 

“Зомин”га ўтиши борасида

- 2021 йилнинг бошида “Зомин” клубидан таклиф тушди. Бунгача мен “Қизилқум”нинг ёшлар жамоаси сафида тўп тепиб келаётгандим. Навоий футбол клуби тарбияланувчиси бўламан. 

- Бу мавсумда биринчи лига ўйинларида тўпурар бўлиб турибсиз. Биринчи лигада гол уриш осонми?

- Йўқ албатта. Жамоадошларим туфайли голларим сонини ошириб бормоқдаман. Уларсиз мен ҳеч қандай натижага эриша олмасдим. Биринчи лигада гол уришнинг ҳам ўзига яраша қийинчиликлари бор. Тўғриси, голларим билан “Зомин”нинг ғалабаларига ҳисса қўшаётганимдан хурсандман. 

- Жамоангиз муддатидан олдин Про-лига йўлланмасига эга бўлди. Вазифани бажариш қийин кечмадими?

- Бу йўлда барча бирдек меҳнат қилди. Бирдамлик эвазига вазифани бажардик. Клубимиз раҳбари Илҳом ака Собиров ҳар томонлама кўмак берди. Бош мураббиймиз эса мавсум давомида тўғри кўрсатмалар бериб борганлиги туфайли вазифани бажаришимиз осон кечди.   

- Аслида сиз қайси позицияда ўзингизни эркин ҳис қиласиз?

- Мен кўпроқ марказий ҳужумда эркин ўйнайман. Аввалари икки қанот ярим ҳимоясида ҳам тўп тепганман. “Зомин”да мураббийларимиз машғулотлар вақтида алоҳида ҳужумчилар учун дастур ишлаб чиққан ва буни синаб кўрамиз. Бу эса янада ўсишимиз учун фойдали деб ўйлайман. 

- “Зомин” клуби билан шартномангиз қачон якунланади? Келгусидаги режаларингиз қандай?

- Шартнома муддатим 2022 йилнинг декабрига қадар мўжалланган. Келгуси мавсумда “Зомин” сафида Про-лига доирасида ўйинларда ҳам голлар уришни истайман.