Михаил Наумов: “Плей-оффда “Динамо” билан ўйнасак керак”

 Аммо сўнгги турларда 1-ўринни ҳамшаҳари “Обод”га “бериб” қўйди. Якунда эса Ильдар Сакаев бошқарувидаги “Оқ-тепа” олий лигада 15-ўринни банд этган клуб билан плей-офф баҳсини ўтказадиган бўлди. Биз эса жамоанинг асосий посбонига айланиб улгурган Михаил Наумов билан суҳбатлашиб, айрим саволларга жавоб олдик.

- Миша, кайфиятлар қандай? Нима янгиликлар?

- Ўртача. Бугундан жамоамиз ўз қароргоҳида йиғилади ва финалга тенг бўлган ўйинга тайёргарликни бошлайди. Айтарли бошқа янгилик йўқ. 

- Жамоангиз чемпионат якунланиб бораётганида яқин таъқибчиси бўлмиш “Обод”ни ўтказиб юборди. Бу сизлар учун кутилмаган зарба бўлдими?

- Ҳа. Сўнгги лаҳзаларга келганда бу жуда алам қилади. Ҳаммаси ўз қўлимизда эди. Аммо бир неча бор жиддий хатоларга йўл қўйдик. Бу эса яқин таъқибчимизга қўл келди. Аксига олиб “Обод” қолган ўйинларда мағлуб бўлмади. Якунда эса пешқадамлик қўлга олди. Биз энг аввало “Орол” ва “Машъал-2” билан ўйинларда ғалаба қозонишимиз керак эди. Шунда олий лигага тўғридан-тўғри йўлланмани қўлга киритган бўлардик. 

- Жамоада ички муҳит яхшими?

- Ҳаммаси кўнгилдагидек. Ҳамма бирга.

- Эндиликда жамоангиз асосий эътиборини плей-офф ўйинига қаратади?

- Шундай. Олий лига жамоасига қарши кечадиган баҳсда ҳам астойдил ўйнаймиз. Имкониятлар 50х50 деган бўлардим. Ҳар икки жамоа учун ҳам финалга тенг ўйин бўлади. 

- Қайси клуб сизларга қарши майдонга тушади деб ўйлайсиз?

- Менимча Самарқанднинг “Динамо” жамоаси бўлса керак. 

- Сизнингча олий лига билан қайси жамоа хайрлашади?

- “Бухоро”.

- Чемпион жамоачи?

- "Пахтакор" бунга жуда яқин турибди.

- Келгуси мавсум учун ҳомаки режаларингиз қандай?

- Албатта олий лигага қайтишни истайман. Ҳозирча аниқ таклифлар йўқ. Агарда плей-офф ўйинида омадимиз чопса, “Оқ-тепа”даги фаолиятимни давом эттираман. 

Исломбек Рустамбеков суҳбатлашди.