Миржалол Қосимов: "Яна ўша эски хатолар қимматга тушди"

Матбуот анжуманининг иккинчи қисмида майдон эгалари бош мураббийи Миржалол Қосимов қатнашди.

- Ўйин ҳақида нима дея оламан. Яна ўша эски хатолар қимматга тушди. "Ал Жаиш"га қарши ўйиндаги бўлгани каби битта футболчи уч-тўрт нафар футболчимизни алдаб гол урди. Айрим футболчиларимиз оддий хатоларга йўл қўйишди. Агар гуруҳдан чиқишни истасак бундай хатолар қилиш керак эмас. Майдонга тушгандан сўнг бор кучи билан ҳаракат қилиш керак, бугунгидек эмас, - дейди Қосимов.

- ОЧЛда фақат кучли клублар ўйнашади, бундай савияда бундай хатоларга йўл қўйиб бўлмайди. Яна бир нарсани унутмайлик, бизда мавсум энди бошланмоқда. Эронда эса иккинчи давра кетмоқда. Ҳали ҳеч нарса бой берилмади. Кейинги ўйин биз учун охирги имконият бўлади.

- Ҳозир футбол битта жойда турмаяпти. Югурмаган футболчи пул топа олмайди. Олдин "ётиб" ҳам футбол ўйнай олиш мумкин эди. Ҳозир ундай эмас. Бугун захирадан тушганлар ўйинни кучайтира олишмади.
 
- Пардаевда ҳам, Шодиевда ҳам имкониятлар бўлди. Аммо тўп билан муомалада хатолар бўлди. Баҳодир рақиб жарима майдони ичида яхши ўйнайди. Аммо бугун кучли рақибга қарши ўйинда тан олиш керак ўйини чиқмади. Майдонга тушгач барча ўз ҳиссасини қўшиш керак. Шу боис ҳам жамоавий ўйин дейилади.

- Ғалаба қозона олмадик, бундан хурсанд эмасман. Ғолиб бўлганимизда имкониятимиз ошиб кетарди. Бугун уч очко учун тушгандик. Сўнгги дақиқаларда урган голимиз бизга умид қолдирмоқда. Лекин дурангдан қониқмадим.