Миржалол Қосимов: “Ҳозирча клублар билан ўйнаб туришга мажбурмиз”

Йиғин доирасида тўртта ўртоқлик учрашуви ўтказиш мўлжалланган ва 22 июль куни футболчилар илк назорат баҳсини “Навбаҳор”га қарши ўтказиб, 5:1 ҳисобида зафар қучишди.

Яхши биласиз, бундан йигирма олдин Хиросимадаги мусобақада иштирок этган жамоамиз олтин медаллар билан юртимизга қайтиб келганди. Ўшанда мусобақада ғолиб чиққан футболчилар орасида Миржалол Қосимов ҳам бор эди. Эндиликда Қосимов бош мураббий сифатида терма жамоани Осиё ўйинларига олиб боради. Мақсад эса ўзгармаган: чемпион бўлиш. “Навбаҳор” билан кечган ўртоқлик ўйинида сўнг Миржалол Қосимовдан интервью олиб, кўпчиликни қизиқтираётган бир қатор саволларга жавоб олдик.

-   Аввало журналистларга бир нарсани айтиб қўйишим керак, бу миллий терма жамоа эмас, олимпия термаси ҳам эмас, - дея таъкидлади Миржалол Қўшоқович.  - Бу Осиё ўйинларида иштирок этадиган жамоадир. 1991 йилда туғилган ва ундан кичик футболчилардан иборат жамоа. Лекин кўп жойларда Ўзбекистон миллий терма жамоаси йиғин ўтказяпти деб ёзилибди. Натижада мухлисларда легионерлар қани, нега чақирилмади деган саволлар юзага келмоқда.

-   Тайёргарлик хусусида нима дея оласиз?
-   Бу таркиб биринчи бор йиғилди. Шу боис олдимизда турган асосий вазифа 14-15 нафар яхши футболчини аниқлаб олиш бўлади. Осиё ўйинларига кўра уч нафар ёши 23дан катта футболчини ўйнатса бўлади ва кейинчалик бу таркибга учта шундай футболчини қўшиб Инчхонга йўл оламиз.

-   Терма жамоамиз аслида Эфиопияга қарши ўртоқлик учрашуви ўтказиши лозим эди.
-   Ҳа, шундай. Режага кўра Эфиопия терма жамоаси Тошкентга келиши ва 27-29 июль кунлари иккита назорат беллашуви ўтказишимиз керак эди. Бироқ нимадир бўлди-ю, улар келмайдиган бўлишди. Ваҳоланки, музокалар бир ойча давом этди. Натижада иккинчи даврага тайёргарлик кўраётган олий лиганинг тўртта клуби билан келишиб қўйдик.

-   “Навбаҳор” билан кечган баҳснинг иккинчи таймида майдонга тушган футболчилар бирмунча яхши ўйин кўрсатишди. Бу нима билан боғлиқ?
-   Биринчи бўлимда тўп сурган йигитлар ҳам ёмон ҳаракат қилишмади. Фақат биринчи таймда “Навбаҳор” ўзининг асосий таркибини қўйгани боис бизга ҳам қийин бўлди. Иккинчи таймда эса таркибни тўлиқ янгиладик. Рақиб сафида ҳам ўзгаришлар бўлди. Шундан сўнг ўйинимиз қовушиб кетди. Лекин жамоа ўйинини янада ўстириш керак. Чунки Осиё ўйинларида бизга осон бўлмайди.

-   Мусобақага борган сари кам вақт қоляпти. Яхши тайёргарлик кўриш учун вақт етармикан?
-   Августда олий лиганинг иккинчи давра баҳслари старт олади. Кейин доим ҳам йиғилиб йиғиин ўтказа олмаймиз. Қолаверса, буёғига ФИФА кунлари билан ҳисоблашишга мажбур бўламиз. Шундай экан, мавжуд имкониятдан келиб чиққан ҳолда ҳозирлик кўрамиз.

-   Осиё ўйинларида мана шу таркибдан фойдаланасизми ёки сафда яна кимнидир кўришимиз мумкинми?
-   Мусобақада шу футболчилардан фойдаланамиз, чунки бошқа ўйинчиларни синаб кўриш учун бизда вақт қолмайди. Шу таркибга уч нафар ёши катта футболчини қўшган ҳолда турнирга жўнаб кетамиз.

-   Ёши катта футболчилар сафга қачон қўшилади? Уларнинг йиғинда иштирок этмасдан бирданига мусобақага олиб кетилиши жамоа ўйинига таъсир кўрсатмасмикан?
-   Таъсири бўлмайди деб ўйлайман. Осиё ўйинларининг ўтказилиш муддати ФИФА кунларига мос келмагани учун легионерлар хизматидан фойдалана олмасак керак. Шу боис ўзимизнинг олий лигада тўп тепаётган футболчилардан олиб кетамиз.  

-   Август ойида Озарбайжон термасига қарши ўртоқлик учрашуви ўтказамиз. Қайси таркиб олиб кетилади?
-   Ҳозир шу ҳақда бош қотиряпмиз. Катта эҳтимол билан у ёққа Осиё ўйинларида иштирок этадиган таркибни олиб кетамиз. Негаки бу фуnболчиларга мусобақа бошлангунча кўпроқ ўйин амалиёти керак бўлади.

-   Шунингдек, сентябрь бошида ҳам иккита ўйинимиз бор: Иордания ва Янги Зеландияга қарши. Бу ўйинларда қайси таркибни синаб кўрмоқчисиз?
-   Бу икки учрашувда миллий терма жамоа тўп суради. Шундан сўнг 10 сентябрда Инчхонга борадиган таркиб йиғилади ва 14 сентябрь куни учиб кетамиз.

-   Нима деб ўйлайсиз, тўққиз кунлик йиғинда фақат олий лига клубларига қарши назорат баҳсларини ўтказишнинг фойдаси борми?
-   Албатта, биз ҳам терма жамоаларга қарши ўйнашни хоҳлаймиз, аммо ҳозирча бунинг имкони бўлмаяпти. Агар Эфиопия розилик берганида яхши бўларди, лекин улар ҳам кўнмади. Шундай экан, ҳозирча ўзимизнинг клублар билан ўйнаб туришга мажбурмиз.