Миллионлар кетидан. РПЛдан Хитой Суперлигасига ўтган футболчилар

Эътиборингизга Россия Премьер-лигасидан Хитойга ўтган футболчиларни тақдим этамиз.

Звездан Мисимович ("Динамо"дан "Бейжинг Женхэ"га)

Россия Премьер-лигасидан Хитой Суперлигасига ўтганларнинг биринчиси босниялик Звездан Мисимович бўлган. Москванинг "Динамо" клубида бир йил ўйнаган Звездан 3,5 млн. евро эвазига "Бейжинг Женхэ"га ўтган. Босниялик Гуйчжоу провинциясидаги жамоада тўрт мавсум муваффақиятли тўп тепиб, фаолиятини якунлаган. Бу вақт ичида у 85та баҳсда майдонга тушиб, 16та гол уришга эришди.

Халк ("Зенит"дан "Шанхай СИПГ"га)

"Зенит" 2016 йилнинг ёзида 55 млн. евро эвазига Халкни "Шанхай СИПГ"га сотишга қарор қилди. Кўпчилик бразилиялик Европага кетади деб ўйлаганди, бироқ у бошқа йўлни танлади. Шанхай клуби футболчига йиллик маоши 20 млн. евро бўлган битим таклиф қилди ва форвард таклифни рад эта олмади. Айни дамда Халк 33 ёшда ва у ҳозиргача Хитой клубида тўп тепмоқда. У ўтган мавсум Суперлига чемпионига айланди. Бразилиялик ҳисобида 72та учрашув ва 41та гол бор.

ОДИЛ АҲМЕДОВ ("Краснодар"дан "Шанхай СИПГ"га)

Халк кетганидан ярим йил ўтиб РПЛнинг яна бир вакили - Одил Аҳмедов Хитой Суперлигасида иштирок этувчи жамоага ўтди. "Краснодар"да икки мавсумни ўтказган Ўзбекистон терма жамоаси сардори Шанхайдан таклиф олди. ОАВда эълон қилинган маълумотларга кўра, хитойликлар ярим ҳимоячи учун 8 млн. евро тўлашган, Аҳмедовнинг йиллик маоши эса 4 млн. еврони ташкил қилади. Ўзбекистон терма жамоаси футболчиси "Краснодар"да йилига 1,7 млн. евро ишлаб топарди. Одил Аҳмедов 46та учрашувда 6та гол уриб, ҳозиргача Хитой клубида муваффақиятли тўп тепмоқда.

Аксель Витсель ("Зенит"дан "Тяньцзинь Тяньхай"га)

"Зенит" Халк билан хайрлашганидан ярим йил ўтиб ярим ҳимоячи Аксель Витселни ҳам Хитой клубига сотди. "Тяньцзинь Тяньхай" Санкт-Петербург клубига 21 млн. евро, футболчининг ўзига эса 18 млн. евро таклиф қилди. ОАВда тарқалган маълумотларга кўра, Акселнинг Хитойдаги йиллик маоши 25 млн. евро бўлган. Бельгиялик "Суперлига"да кўп ушланиб қолмади. 36та учрашувда 5та гол урган Аксель Витсель бир мавсумдан сўнг Дортмунднинг "Боруссия" клубига ўтди.

Неманья Пейчинович ("Локомотив"дан "Чанчунь Ятай"га)

"Локомотив"нинг асосий таркибидаги жойини йўқотиб қўйган ҳимоячи Неманья Пейчинович "темирйўлчилар" сафини тарк этиб, Хитойга йўл олишга қарор қилди. Эркин агент сифатида "Чанчунь Ятай" билан шартнома имзолаган сербиялик футболчи Хитой клубининг асосий таркиб ўйинчисига айлана олмади (13та ўйин, 2та гол). Ҳозир у яна ишсиз ва ўзи учун муносиб жамоа изламоқда.