Миллий терма жамоа Тошкентда машғулотларга киришди

Ўзбекистон миллий терма жамоаси 12 август куни Тошкент навбатдаги йиғинини бошлади. Режага кўра, терма жамоа аъзолари 14 августгача Тошкентдаги «ЖАР» стадионида машғулот ўтказади. ЎФФ терма жамоалар маркази директори Асқар Толибжоновга кўра, ушбу  йиғин давомида миллий терма жамоа маҳаллий клублардан бирига қарши ўртоқлик-назорат учрашувини ўтказиши режалаштирилган. Миллий терма жамоа бош мураббийи Миржалол Қосимов мазкур йиғинга жами 26 нафар футболчини таклиф этган.

Таъкидлаш жоиз, 14 август куни Тошкнетда ўтказилиши керак бўлган Ўзбекистон ҳамда Туркия миллий терма жамоалари ўртасидаги учрашув бекор қилинган эди. Эслатиб ўтамиз, Ўзбекистон миллий терма жамоаси 6 ҳамда 10 сентябрь кунлари ЖЧ-2014 саралаши плей-офф босқичида Иордания терма жамоасига қарши баҳс олиб боради. Терма жамоалар ўртасидаги дастлабки ўйин 6 сентябрь куни Иордания пойтахти Амман шаҳрида ўтказилса, жавоб учрашувига 10 сентябрь куни Тошкент мезбонлик қилади.