"Металлург": Февзи Давлетовни табриклаймиз!

Клуб маъмурияти, мураббийлар штаби, ўйинчилар ва бутун футбол ишқибозлари номидан Февзи Ризаевични таваллуд айёмлари билан табриклаймиз.

1994 – 2005 йилларда Ўзбекистон миллий терма жамоасида фаолият юритган, Хиросима-94 Осиё ўйинларида тарихий ғалабани қўлга киритган, терма жамоамиз тарихидаги энг яхши чап қанот ҳимоячиси Февзи Давлетов бугун 44-баҳорини қаршиламоқда. 1972 йилнинг 20 сентябрида Тошкент шаҳрида туғилган Февзи Давлетов терма жамоа таркибида 48 та ўйинда майдонга чиққан ва 3 та гол киритган.

Февзи Давлетов фаолиятини Наманган “Навбаҳор” жамоасида бошлаган. 1990-91 йилларда навбаҳорчилар таркибида собиқ Иттифоқ биринчилигида 32 та ўйинда (1 та гол) майдонга тушган бўлса, Миллий чемпионатимиздаги 29 та учрашувда ҳам бир марта муваффақият қозонган. Кейин турли йилларда “Бинокор”, МҲСК, “Дўстлик”, “Қизилқум”, “Андижон” клубларида ўйнади (223 та ўйин, 37 та гол).  Хориж клубларидан “Рубин” (Россия, 11), “Автомобилист” (Россия, 9), “Беласица” (Беларусь, 12), “Иртиш” (87-2), “Жетису” (24), “Мегаспорт” (36-1, барчаси Қозоғистон) жамоаларида фаолият олиб борди. Футболчи сифатида у жами 511 та ўйинда майдонга тушган ҳамда 45 та гол муаллифи бўлган. Осиё ўйинларининг ғолиблигидан ташқари 3 марта Ўзбекистон чемпиони (1997, 1999, 2000), мамлакат вице-чемпиони (1995), бронза медали совриндори (1993, 1996), Ўзбекистон кубогининг соҳиби (1992, 1999/2000) бўлган. Футболчиликдаги меҳнатлари учун “Шуҳрат” медали билан тақдирланган.

Мамлакатимиз футболининг ёрқин вакилларидан бири Февзи Ризаевич Давлетовни миллионлар ўйинига бефарқ бўлмаган барча юртдошларимиз номидан яна бир марта самимий қутлаймиз ва у инсонга узоқ умр, сиҳат-саломатлик, оилавий хотиржамлик ҳамда келгуси фаолиятларида улкан зафарлар тилаймиз!