Мессидан хафа бўлдим

"Якуний қарорни қабул қилдим. Терма жамоа билан соврин ютишга бор кучим билан ҳаракат қилдим, аммо бу яна қўлимиздан келмади. Мен жуда муҳим пенальтини амалга ошира олмадим. Кийиниш хонасида терма жамоадаги фаолиятимга якун ясашга қарор қилдим. Тўртта финалда мағлуб бўлдим. Бугун ғалаба қозонишга ҳаракат қилдик... аммо кўрганингиз содир бўлди. Кетаман, бу ҳамма учун яхши. Финалдаги мағлубият бизни қониқтирмайди. Аргентина билан чемпион бўлишни жуда истаган эдим, аммо ўхшамади".

Туйғулар? Алам? Жазава? Кучсизлик? Мессининг қарорига ўзингиз истаганча баҳо беринг, аммо хулоса шундай:

Лионель Месси - Агуэро, Игуаин, Маскерано ва бошқа юлдузлар билан ўйнайди, йирик турнирлар финалига чиқади, ҳеч нарса юта олмагани учун терма жамоадаги фаолиятини 29 ёшда якунлайди.

Криштиану Роналду ўйнайдиган терма жамоада ундан бошқа юлдуз йўқ (майли Пепени ҳисобга оламиз), турнирларга жароҳат билан келади, клубдаги фаолияти билан таваккал қилади, жамоасини плей-оффга олиб чиқади, Португалия учун барчасини бажаради, аммо ҳеч қандай соврин қўлга кирита олмаслигини яхши билади.

Ҳа, Месси - даҳо, футбол тарихидаги энг яхши футболчи, аммо 29 ёшда терма жамоадан кетиш... Буюк футболчилар эгоист бўлишини тушунамиз, аммо бу борада етакчилардан ҳисобланган Златан Ибрагимович ҳам 34 ёшида ҳеч нарсага ярамайдиган Швеция сафида тўп тепди.

Лео Марадонадан фойдалироқ ва ақллироқ бўлиши мумкин, аммо у майдонни хафа бўлган мактаб ўқувчисидек тарк этди.