Мажлис келишилган ўйинлар масаласини кўтарди

Депутат Абзал Куспан Бош прокурор Берик Асиловга ҳуқуқ-тартибот идоралари иштирокида ана шундай фактлар бўйича тергов бошланишини сўраб депутатлик сўрови юборди, деб ёзмоқда "Kazinform.

"Тегишли тузилмаларни жалб қилган ҳолда Қозоғистон футболида қайд этилган келишилган ўйинлар фактларини ҳар томонлама текширишни ташкил қилишингизни сўрайман”, – деди депутат.

Sportradar халқаро компанияси маълумотларига кўра, 2022 йилда Қозоғистон аниқланган келишилган ўйинлар сони бўйича дунёда 4-ўринни эгаллаган.

"Бу адолатсиз ўйин кенг тарқалгани ва расмий эътироф этилганини тасдиқлайди", – деди Куспан.

Шунингдек, у Қозоғистон футбол федерацияси президенти Марат Омаров муаммо борлигини тан олгани, аммо уни ҳал қилиш бўйича тизимли чора-тадбирлар ҳалигача кўрилмаганини таъкидлади. Шу билан бирга, жамоат ташкилотлари ва оммавий ахборот воситаларида букмекерлар ўйинларни линиялардан олиб ташлаши ҳолатлари қайд этилмоқда, бироқ бу фактлар ўрганилмаганлигича қолмоқда.

Халқаро тажриба мисолида Куспан бир қатор ҳолатларни келтирди:

Германия (2005) – ҳакам Роберт Хойзер келишилган учрашувларда қатнашгани учун 2 йилу 5 ойга қамалган;

Жанубий Корея (2011) – 57 нафар футболчи жазоланган;

Италия (2015) – клуб президенти Антонио Пульвиренти жавобгарликка тортилган, жамоа еврокубоклардан четлаштирилган;

Хитой (2013) – юқори мартабали футбол амалдорлари ва ҳакамлари 5 йилдан 10 йилгача қамоқ жазосига ҳукм қилинган;

Вьетнам (2005) – терма жамоа футболчилари 3-4 йилга қамалган.

Депутатнинг фикрича, бу муаммо спорт доирасидан ташқарига чиқиб кетган. Давлат органларидаги қонунбузарликлар билан бир қаторда квазидавлат секторида, тижорат ва нодавлат ташкилотларида ҳам фирибгарлик схемалари ва молиявий махинациялар қайд этилиб, етказилган зарар миқдори миллионлаб, ҳатто миллиардлаб тенгега етади.