"Локомотив": Бугунги машғулот “Қирол Абдуллоҳ”да

Эртага – 1 март куни жамоамиз мазкур шаҳарнинг “Ал-Иттиход” клубига қарши саф тортади.

Якшанба куни 10:00 да Тошкент халқаро аэропортидан қўзғалган ҳамда ўз бортига “Локомотив” делегациясини олган самалёт беш соатдан бироз кўпроқ парвоз этиб, Жидда халқаро аэропортига қўнди. Клуб айни пайтда “Radisson BLU” меҳмонхонасидан қўним топган. Эртанги беллашув олдидан таркибда битта йўқотиш бор ва у Жасур Ҳасанов номи билан боғлиқ. Асосий таркибнинг қолган аъзолари муҳим ўйинга тайёр бўлиб туришибди.

Жиддада маҳаллий вақт Тошкентникидан икки соат ортда юради. Ҳаво ҳарорати кутилганидек иссиқ. Бугун “Локомотив” футболчилари ўйин бўлиб ўтадиган “Қирол Абдуллоҳ” стадионида машғулот ўтказишади. Унга қадар эса ҳар икки клуб расмийлари иштирокида ўйинолди митинг ҳамда матбуот анжумани ташкил этилади.

Қайд этиш керак, “Ал-Иттиход” сўнгги бир ҳафта давомида икки муҳим беллашувда майдонга тушди. Тошкентда “Локомотив” билан 1:1 ҳисобида дуранг ўйнаган Виктор Пицурке шогирдлари, кейинчалик миллий чемпионатнинг марказий ўйинида пешқадам “Ал-Ҳилол”ни сафарда минимал ҳисобда таслим этишди.

Бу натижалар рақибнинг кучидан далолат бериб турибди. Шунга қарамай “Локомотив” футболчилари эртанги ўйинда фақат ва фақат ғалаба учун майдонга тушишади. Умид қиламизки, ортга 3 очко билан қайтамиз.