Кутилмаган хабар: "Ал Наср" жазоирлик футболчини трансфер қилди ва Ҳамдамовга чиқиш эшикларини очмоқда(ми)?

Меҳди Обеид "Нант" клубига 2019 йилда ўтган ва францияликлар билан 2022 йилга қадар шартнома имзолаганди. "Ал Наср" жазоирлик марказий ярим ҳимоячини "Нант" клубидан сотиб олди ва бугун мазкур ўтишни эълон қилди. Эътиборли тарафи шундаки, "Ал Наср" клуби Обеид билан 1,5 йиллик шартнома имзоланганини маълум қилиб, қўшимча сифатида футболчи яқиндагина жамоага эркин агент сифатида қўшилган Достон Ҳамдамов ўрнига рўйхатдан ўтказилиши ҳақида ёзган.

Бундан кўриниб турибдики, "Ал Наср" Ҳамдамов билан хайрлашиш арафасида. Клуб Ҳамдамов билан ўртадаги шартнома икки ёки бир томонлама бузадими ёки футболчини ижарага берадими, бу ҳозирча номаълум.

Эслатиб ўтамиз, Достон Ҳамдамов "Пахтакор" билан шартномаси тугагач "Ал Наср"га текинга ўтган ва амирликлар билан 1,5 йиллик шартнома қилганди.

Достон Ҳамдамов шу вақт мобайнида "Ал Наср" сафида кубок доирасида 1 ва чемпионатда икки ўйинда иштирок этди. Эътиборли тарафи, Ҳамдамов ҳамма ўйинда асосий таркибда тушди, лекин ҳеч бир учрашувни тўлиқ ўтказмай захирага олинди.