Куман Лукакуни "Барса"да кўришни истаган, бироқ...

"Интер" ҳужумчиси Ромелу Лукаку "Барселона" бош мураббийи Роналд Куманнинг асосий трансфер мақсади эди, деб хабар бермоқда Каталониянинг Esport3 телеканали.

Манбага кўра, бельгиялик ҳужумчи 57 ёшли мутахассис учун ҳужум чизиғини кучайтиришнинг устувор варианти бўлган, аммо қийин иқтисодий вазият туфайли "Барселона" форвард билан шартнома имзолай олмади.

Куман 27 ёшли футболчини "Барса"дан кетишга яқин турган ҳужумчи Луис Суаресга ўринбосар сифатида кўрган.

Маълумот учун, мураббий Лукаку билан 2016 йилдан 2017 йилгача "Эвертон"да бирга ишлаган. Бельгиялик ўшанда 37 учрашувда 25 та гол урган.

Форвард 2019/20 йилги мавсумда А Серияда 36 учрашув ўтказди ва 23 та гол урди.