Конте кечаги ўйиндан кейинги матбуот анжуманида ёнди!

"Кучли, рақобатбардош жамоа бўлишни, доимо ғолиблик учун курашишни истасангиз, асосийси юракда, кўзда олов бўлиши керак. Ҳар сонияда майдонда олов сочиш керак. Ҳар сонияда!

Ўтган мавсум билан солиштирганда биз янада кучлироқ бўлишимиз керак эди, бироқ биз борган сари таслим бўлиб боряпмиз. Қачонки жамоавийлик йўқолса, рақиб истаган ишни қилади. "Саутгемптон"га қарши ўйин - сўнгги мисол. Биз Англия Кубогида ёшлари билан ўйнаган "Шеффилд"га мағлуб бўлдик. Биз кучли таркиб билан ўйнадик ва Англия Кубогидан чиқиб кетдик. Бундай ҳолатлар кўп бўлган. Такрорлайман, биз умуман ўсмаймиз. Гап тактика ёки техника ҳақида кетмаяпти.

Биз мухлисларимиз фахрланиши учун ўйнашимиз керак. Биз катта иштиёқ билан ўйнашимиз керак. Ғалабалар учун кўзда олов бўлиши керак. Агарда шундай бўлганида биз Англия Кубогидан чиқиб кетмасдик. Агарда шундай бўлганида биз "Саутгемптон"ни мағлуб этардик. Агарда бу олдинроқ бўлганида ишлар бошқача кетарди.

Аммо биз бунга кўникиб улгурганмиз. Клуб, бу ерда ишлаётган ҳар бир мураббий трансферлар бўйича жавобгарликни бўйнига олиши керак. Футболчиларчи? Футболчилар? Қани улар? Менинг тажрибамга кўра улар ўсишлари, ривожланишлари керак эди. Лекин биз рақобатбардош бўлишни истамаяпмиз. Бу ҳолат бизда ёмон, ёмон, жуда ёмон даражада. Мен майдонда ўзи учун шунчаки югуриб юрган 11 футболчини кўриб турибман", - деди Конте.