Клаудио Раньери: "Мен Конте ва Аллегрини жуда ҳурмат қиламан"

Маълумки, италиялик мураббийларнинг жаҳон футболида тутган ўрни ниҳоятда катта. Арриго Сакки, Марчелло Липпи, Фабио Капелло, Жованни Трапаттони - буларнинг барчаси футболда ўз изларини қолдиришган. ФИФА талқинига кўра, ўтган йил жаҳоннинг "Энг яхши мураббийи" деб топилган Клаудио Раньери ҳам эришган совринлари туфайли мухлислар қалбидан ўрин эгаллаган. 

Раньери айни пайтда Франциянинг "Нант" клубини бошқармоқда. Мутахассис яқинда ФИФА расмий сайтига интервью бериб, ёш мураббийлардан Антони Конте билан Массимилиано Аллегрини мақтаб ўтди. 

- Маълумки, сиз ўтган йил "Энг яхши мураббий" деб топилгандингиз. Бу мукофот сиз учун нимани англатади? 
- ФИФАнинг нуфузли соврини менга "Лестер" билан Англия чемпиони бўлганим учун берилганини биламан. Бу соврин мен учун жуда қадрли, чунки у барчага ҳам насиб этавермайди.

- Бу йил энг яхши бўлиш учун Зидан, Конте ва Аллегри ўзаро кураш олиб боришади. Сизнингча, ютуқ кимга насиб этади? 
- Мен бу ўринда бир кишини алоҳида ажратиб кўрсата олмайман. Уларнинг учаласи ҳам яхши мураббийлар. Энг яхши бўлишга даъвогарлардан икки нафари италиялик ва бу мени хурсанд қилади. Мен Конте ва Аллегрини жуда ҳурмат қиламан. Улар катта ютуқларни қўлга киритишди ва ҳамон уларнинг жамоаси яхши ўйин кўрсатишда давом этмоқда. Бу мураббийлар ёш ва уларнинг ғалабаларга бўлган ташнаси жуда юқори.

- Италиялик мураббийлар доим энг зўрларидан бири бўлиб келишган. Бунинг сабаби нмада? 
- Менимча, ҳамма гап итальян футбол мактабида бўлса керак. Жуда кўпчилик Италияга келиб ишлашни хоҳлайди, чунки Италияга келган одам тартин-интизом нималигини ўрганади. Қолаверса, ички чемпионат ҳам кучли. Хоҳ мураббий, хоҳ футболчи учун Италия чемпионати кўп нарса беради. 

- Қайси италиялик мураббий футболга энг катта таъсир ўтказган деб ўйлайсиз? 
- Менимча, бу Арриго Сакки бўлса керак. Унинг Италияда таъсир доираси жуда катта бўлган. Саккининг "Милан"и қандай ўйнаганини кўпчилик билса керак. Мухлислар итальян футболи деганда ҳимоявий ўйинни тушунишади, аммо Сакки бу қарашни ўзгартира олган.