Клас-Ян Хунтелар Марко ван Бастенни ортда қолдирди

“Аякс” ҳужумчиси Клас-Ян Хунтелар Голландия чемпионати 5-турида “Гронинген”га қарши ўйинда дублга эришди. Биринчи бўлимда 35 ёшли ҳужумчи пеналтини аниқ амалга оширди. Бу унинг учун Голландия чемпионатидаги 128-гол бўлди. Шу тариқа Хунтелар афсонавий Марко ван Бастенни ортда қолдирди. Унинг ҳисобида 127 та гол бўлган. Энди ҳужумчи Эредивизия тўпурарлари рейтингида 23-ўринни банд этиб турибди. 1-ўринда эса Вилли ван дер Кюйлен 311 гол билан бормоқда. Шунингдек, Хунтеларнинг ўйиндаги биринчи голи унинг фаолиятидаги миллий чемпионатларда урилган 250-гол бўлди.

Маълумот учун, Хунтелар Голландия миллий терма жамоаси тарихидаги энг яхши иккинчи тўпурар футболчи ҳисобланади. Унинг ҳисобида 42 та гол бор. Биринчи ўринда эса 50 та гол билан Робин ван Перси бормоқда.