Кейинги йил ёзда Ўзбекистон Қирғизистон билан ўйнаши мумкин
15 dec 2015 13:27
News

Кейинги йил ёзда Ўзбекистон Қирғизистон билан ўйнаши мумкин

Ўзбекистон миллий терма жамоаси кейинги йилда Қирғизистон терма жамоаси билан ўртоқлик учрашуви ўтказиши мумкин.

Қирғизистон футбол Федерацияси расмий сайти тарқатган хабарга кўра, миллий терма жамоа 2016 йил ёзидан бошлаб 8та ўртоқлик учрашуви ўтказмоқчи. Уларнинг 6таси ўз майдонида, 2таси рақиб майдонида ташкил этилиши кутилмоқда.

Бу борада ҚФФ июнь ойида ўйин ўтказиш учун Қатар, БАА, Ўзбекистон ва Қозоғистон терма жамоалари билан музокара олиб бормоқда.

Қўшниларимиз сентябрь ойида эса Польша ва Хорватия каби Европанинг кучли терма жамоаларини Қирғизистонга таклиф қилишмоқчи. Октябрь ойида Баҳрайн ва Вьетнам билан ўйинлар режалаштирилган. Ноябрда сафарда Баҳрайн билан ўртоқлик учрашуви ўтказиш кутилмоқда.

Эслатиб ўтамиз, Қирғизистон терма жамоаси ЖЧ-2018 саралаши учинчи босқичига чиқиш учун кураш олиб бормоқда. Жамоа гуруҳда 11 очко билан Австралия (15) ва Иорданиядан (13) кейинги учинчи ўринни эгаллаб турибди.

Жамоа иккинчи босқичдаги сўнгги ўйинни 29 март куни Тожикистонга қарши ўтказади.