Карантинга ёрдам. "Локомотив" ПФК хайрли ишга қўл урди

Юртимизда 16 мартдан карантин эълон қилингани ҳамда барча спорт тадбирлари тўхтатилганидан хабарингиз бор. Буларнинг барчаси дунё жамоатчилиги диққат-марказида бўлиб турган коронавирусга қарши самарали курашиш йўлида қилинмоқда. 

Ўзбекистоннинг кетма-кет уч карра чемпиони "Локомотив" футболчилари ва мураббийлар штаби шундай синовли кунларда халқимиз дардига малҳам бўлиш мақсадида хайрли ишга қўл ўришди ва ўз маошларининг маълум қисмини карантинда қолаётган аҳоли соғлиғи учун ажратишга қарор қилишди. 

Жамоамиз аъзоларидан йиғилган пулларга қўшимча тиббий ниқоблар, тиббий қўлқоплар ва бошқа керакли нарсалар харид қилинади. "Локомотив" ПФК Ўзбекистон аҳолисини шу кунларда қийнаётган глобал муаммога бефарқ қараб турмайди ва юртимиздан коронавирус тезроқ даф бўлиши учун қўлдан келганча ўз ҳиссасини қўшади. 

Шу ўринда Суперлиганинг бошқа клубларини ҳам #karantingayordam хэштеги орқали ўзига хос акцияга чорлаб қоламиз. Зеро бу касаллик фақат коронавирусга чалинганлар муаммоси эмас, балки ҳаммамиз учун долзарб масаладир. 

Умид қиламизки, ҳали қувончли кунлар олдинда. Коронавирусни йўқотиш фақат Давлат зиммасидаги иш бўлиб қолмасдан бунга қарши ҳар бир фуқаро кураш олиб бориши лозим. Бунинг учун сиздан талаб қилинадигани уйда қолиш ва саломатлик гигиенасига амал қилишдир. 

Кўчага чиқманг, уйда қолинг ва шу орқали коронавирус барҳам топишида ўз ҳиссангизни қўшинг. 

"Локомотив" ПФК матбуот хизмати.