Камолиддин Тожиев: "Натижа бор, лекин жамоамиз ўйинидан қониқмадим"

- Ўйин ҳақида гапирадиган бўлсам, учрашувдан аввал йигитларга ҳамма майдонга юқори кайфиятда чиқиши керак деб айтгандик. "Олимпик-MobiUz"да 20 ёшли ўйинчилар ўйнайди деб шунчаки майдонга чиққанлар ҳам бўлди. Яъни, жамоамизда рақибни менсимаслик ҳолати кузатилди. Ўйин томонлама "Олимпик-MobiUz" бизга нисбатан яхши ҳаракат қилди, фақат тажриба бобида ютиб кетдик деб ўйлайман. Бизда вазиятлар кам бўлди, икки-учта вазиятдан гол урдик. Тўғриси, жамоамиз ўйинидан қониқмадим.

- Бугун "Пахтакор" йирик ҳисобда зафар қучса керак деб тахмин қилгандик. "Олимпик-MobiUz" сизларга қарши нима тайёрлай олди? Иккинчи савол: "Навбаҳор" билан ўйиндан олдин бундай ҳаракат қилиш кейинги баҳсда салбий таъсир кўрсатмасмикин?

- Рақибни яхши ўргандик, аммо улар томонидан янгилик кўрмадим. "Олимпик-MobiUz" аввалги баҳсларда қандай ҳаракат қилган бўлса, бугун ҳам шундай ўйин кўрсатди. "Навбаҳор" билан эса умуман бошқача ўйин бўлади деб ўйлайман.

- Кубок учун даъвогар баъзи жамоалар мусобақани эрта тарк этди. Бу ҳақда фикрингиз?

- Ҳамма яхши жамоалар чиқиб кетгани йўқ, ҳалиям кучли клублар қолган. Кейинги босқичда ким рақиб бўлиши? Тўғриси, билмайман. Биз ҳар бир жамоани ҳурмат қилган ҳолда Кубокни қўлга киритишни истаймиз. Мақсадимиз шу.

- Суперлигада ёзги трансфер ойнаси очилди. Жамоани кимлар тарк этиши ҳақида маълумот бера оласизми?

- Трансфер очилган бўлса-да, ҳали биринчи давра тугагани йўқ, шу боис бу саволингизга жавоб бера олмайман. Фақат шуни айтишим мумкин, баъзи чизиқларни кучайтириш учун бизга икки-уч нафар яхши футболчи керак.

- Ҳожимат Эркинов "Пахтакор"га қайтаётгани ҳақида гаплар қанчалик ҳақиқатга мос?

- Ҳожимат билан музокаралар олиб борилаётгани рост. Бу борада фақат шуни айтишим мумкин.

- Муҳаммадали Ўринбоев бугун қайдномадан ўрин олмади. Уни Бельгиянинг "Антверпен" клубига ўтаётганини эшитдик.

- Муҳаммадали 4 июль куни Бельгияга учиб кетади. Бу аниқ.

- Ҳожиакбар Алижонов "Насаф" билан ўйнамаганди, бугун эса захирадан қўшилди. У "Навбаҳор" билан тўлиқ ўйнай оладими?

- Ҳожиакбарда жароҳат борлиги сабаб "Насаф"га қарши қўймагандик. Бугун ҳам жароҳат билан ҳаракат қилди. Лекин "Навбаҳор"га қарши асосий таркибда майдонга тушиб тўлиқ ўйнашидан умидвормиз.