Кабальеро пенальти қайтариш бўйича Кепадан омадлироқ экан

Баҳс якунланишига бир неча дақиқа қолганида бош мураббий Маурицио Сарри Аррисабалага ўрнига Вилли Кабальерони туширмоқчи бўлди, аммо табло кўтарилганига қарамай, Кепа майдонни тарк этишни истамади. Натижада италиялик мутахассис ғазаб билан сув идишни ерга отди ва трибунаости йўлакчасига йўл олди. Бир неча сония ўтиб мураббий майдонга қайтди. Пенальтилар сериясида "Манчестер Сити" ғалабага эришди.

Ушбу воқеадан сўнг, B/R Football нашри "Челси" посбонларининг пенальтилардаги муваффақиятларини ўрганиб чиқди. Кепа Аррисабалага фаолияти давомида 25 марта 11 метрлик жарима зарбасини қайтаришга уринган ва уларнинг 8тасида (32%) ўз мақсадига эришган. Анча тажрибага эга бўлган Вилли Кабальеро дарвозаси томон эса 36 марта пенальти белгиланган. Кабальеро бундай жарималарда ҳамкасбидан анча муваффақиятлироқ экан. У 15та зарбани (42%) қайтара олган.