ЖЧ саралаш. Саудия Арабистони Тошкентда ютиб кетганидан бери нечта ўйин ўтказди?

Тошкент вақти билан соат 23:00да Ар Риёддаги "King Saud University" стадионида Саудия Арабистони - Ўзбекистон учрашуви старт олади. Гуруҳ жадвалида саудияликлар 17 очко билан биринчи, Ўзбекистон эса 15 очко тўплаган ҳолда иккинчи ўринда бормоқда. Демак, бугунги тўқнашув гуруҳда биринчи бўлиш масаласини ҳал қилади. 

Шу пайтгача ҳар икки жамоа жаҳон чемпионатлари саралаш ўйинларида ўзаро 5 марта кураш олиб борган. Шундан учтасида Саудия Арабистони терма жамоасини қўли баланд келган бўлса, бир марта Ўзбекистон миллий терма жамоаси ғалаба қозонган ҳамда битта ўйин дуранг билан якун топган. ЖЧ саралаш ўйинларида ягона ғалабамиз 2008 йилнинг 26 март санасида рўй берган. 

Ҳозирги "Бунёдкор" стадиони ўрнида олдин МҲСК стадиони бўларди. Ўша ўйингоҳда саудияликларни 3:0 ҳисобида мағлуб этганмиз. Рауф Инилеев қўл остида тўп тепган футболчилардан Тимур Кападзе, Максим Шацких ва Сервер Жепаров гол муаллифи бўлишган. 

Саудия Арабистонига қарши ҳозирча охирги учрашувни 2019 йилнинг ноябрь ойида ўтказдик ва "Пахтакор" стадионида кечган баҳсда 2:3 ҳисобида ютқазиб қўйдик. Бу ўйинда Элдор Шомуродов билан Отабек Шукуров гол муаллифи бўлганини яхши биласиз. 

Саудия Арабистони бизни Тошкентда ютиб кетганидан бери 12та баҳсда майдонга тушди. 

19.11.2019. Ўртоқлик учрашуви. Саудия Арабистони - Парагвай 0:0

27.11.2019. Кўрфаз Кубоги. Саудия Арабистони - Қувайт 1:3

30.11.2019. Кўрфаз Кубоги. Баҳрайн - Саудия Арабистони 0:2

02.12.2019. Кўрфаз Кубоги. Уммон - Саудия Арабистони 1:3

05.12.2019. Кўрфаз Кубоги. Саудия Арабистони - Қатар 1:0 

08.12.2019. Кўрфаз Кубоги. Баҳрайн - Саудия Арабистони 1:0 

14.11.2020. Ўртоқлик учрашуви. Саудия Арабистони - Ямайка 3:0 

17.11.2020. Ўртоқлик учрашуви. Саудия Арабистони - Ямайка 1:2

25.03.2021. Ўртоқлик учрашуви. Саудия Арабистони - Қувайт 1:0

30.03.2021. ЖЧ-2022 саралаш. Саудия Арабистони - Фаластин 5:0

05.06.2021. ЖЧ-2022 саралаш. Саудия Арабистони - Яман 3:0

11.06.2021. ЖЧ-2022 саралаш. Сингапур - Саудия Арабистони 0:3

Ўтказилган 12 ўйиннинг 8тасида саудияликлар ғалаба қозонган бўлса, 3 марта мағлубиятга учрашди ҳамда бир бор дуранг қайд этишди. Эътиборлиси, бу жамоа охирги 4та ўйинни ғалаба билан якунлади ҳамда ўз дарвозасидан гол ўтказиб юбормади.