ЖЧ саралаш босқичи иштирокчилари ноябрда кимлар билан ўйнайди?

Яқинлашиб келаётган ойда барча қитъаларда жаҳон чемпионати саралаш ўйинлари билан бир қаторда ундан аввал ёки сўнг ўртоқлик беллашувлари ташкил этиш ҳам кўзда тутилган. Шу жумладан, қитъамизда мухлислар саралаш ўйинларидан олдин бир қатор баҳсларга гувоҳ бўлишади.

Биринчи навбатда жаҳон чемпионати саралаш беллашувларида курашни давом эттираётган жамоаларнинг учрашувлари биз учун қизиқроқ. Шу сабабли дастлаб уларнинг ўйинлари хусусида сўз юритамиз.

Гуруҳдошларимиздан Жанубий Корея бизга қарши ўйин арафасида ўз майдонида Канадани қабул қилади. Беллашув 11 ноябрь куни ўтказилади. Аслида ушбу муддатда корейслар Сальвадор билан баҳсни режалаштиришганди, бироқ кейинчалик рақиб номи ўзгарди. Шу тариқа Кореяга Канада ташриф буюрадиган бўлди. ФИФА кунлари 7 ноябрдан бошланишини инобатга олсак, Ули Штилике канадаликларга қарши учрашувда бемалол асосий таркибдан фойдаланиш имкониятига эга бўлади. Айнан шу учрашувни кузатиб Кореянинг биз билан ўйингача бўлган ҳолатидан бохабар бўлишимиз мумкин. Эслатиб ўтамиз, Канадага қарши ёзда терма жамоамиз олий лигада ўйнайдиган футболчилар билан майдонга тушиб, 1:2 ҳисобида ютқазганди.

Эрон эса 11 ноябрь куни Дубайда Ироқ терма жамоаси билан ўтадиган учрашувини бекор қилди. Қатар эса 10 ноябрь санасида Россияни Дохада қабул қилади. Дохада навбатдаги икки мундиал мезбонлари майдонга тушади.

Терма жамоамизнинг 10 ноябрь куни Тошкентда Иорданияни қабул қилишидан ишқибозлар хабардор. Бунгача иорданияликлар 6 ноябрда Ироқ билан ўйнашади. Демак, Иордания ва Ироқ бу муддатда бир неча ўртоқлик учрашувида майдонга тушишни режалаштирган. Нариги гуруҳда ўйнаётганлар орасида Ироқдан ташқари Япония ҳам ўртоқлик ўйини ўтказишни мўлжаллаган. Самурайлар Уммонни қабул қилишади.

Ён қўшниларимиз ҳам ноябрь ойидаги ФИФА кунларидан унумли фойдаланишади. Қирғизистон терма жамоаси Филиппин ва Баҳрайн термаларига қарши ўртоқлик учрашуви ўтказиш юзасидан келишувга эришган. Охирги пайтларда ушбу мамлакатда футболга эътибор анча ўсиб бораётганини таъкидлаш лозим. Терма жамоа бирин-кетин ўртоқлик ўйинлари ўтказяпти ва федерациянинг ўзида ижобий ишлар амалга оширилмоқда.

Тожикистон эса Туркманистон билан учрашувда майдонга тушади. Бунда Марказий Осиёнинг ўзига хос дербисига гувоҳ бўламиз.

Осиё жамоаларининг ноябрь ойидаги ўртоқлик учрашувлари
4 ноябрь
Мьянма  Индонезия
6 ноябрь
Иордания  Ироқ
КХДР  Хитой Тайпейи
Гонконг  Гуам
8 ноябрь
Вьетнам - Индонезия
9 ноябрь
Филиппин - Қирғизистон
Тожикистон  Туркманистон
Гуам  КХДР
Гонконг  Хитой Тайпейи
10 ноябрь
Қатар  Россия
Ливан  Фаластин
Ўзбекистон  Иордания
11 ноябрь
Жанубий Корея  Канада
Япония  Уммон
12 ноябрь
Хитой Тайпейи  Гуам
Гонконг  КХДР
13 ноябрь
Тожикистон  Афғонистон
14 ноябрь
Малайзия  Папуа Янги Гвинея
15 ноябрь
Баҳрайн - Қирғизистон
Иордания  Ливан