Ишончни оқла, шоввоз

Европада трансфер ойнаси ёпилди. Энди келаси йилнинг бошигача клублар мўмай даромадга сотиб олинган футболчиларни синовдан ўтказишади. Ушбу ўйинчиларнинг ҳаммаси ҳам ишончни оқлай билишармикин? Буни албатта, вақт кўрсатади. Биз эса эътиборимизни жазирама ёзнинг энг қайноқ трансферларига қаратамиз.

10. Жоау Мариу - 40 млн. евро «Спортинг»  «Интер»

23 ёшли ярим ҳимоячи Евро-2016нинг энг яхши ўйинчиларидан бирига айланиб, Португалия терма жамоаси билан чемпионликни нишонлади. Шу боис, уни ўз сафида кўришни истаган топ-клублар сони ортди. Ўзига хос курашда «Интер» чаққонлик қилди ва Мариу учун лиссабонликларга 40 млн. евро тўлади. Бундан ташқари, «Спортинг» ушбу футболчининг муваффақиятли иштироки эвазига яна 5 млн. евро бонусга эга бўлиши мумкин. Жоау «нерадзурри» сафида дебютини нишонлашга улгурмади. Португалия чемпионатининг ўтган мавсумида 33та ўйин ўтказиб, 6та тўп киритган Жоау шерикларини 11 марта голли «пас» билан таъминлаган.

9. Шкодран Мустафи - 41 млн. евро «Валенсия» «Арсенал»

Германия терма жамоаси сафида ЖЧ-2014 чемпионлигини нишонлаган футболчи Англияга қайтмоқда. Мустафи фаолиятини «Эвертон»да бошлаган бўлсада, премьер-лигада Ливерпуль клуби шарафини ҳимоя қилишга улгурмаган. Мана, энди «Арсенал» унинг учун «Валенсия»га 41 млн. евро тўлади. Испания жамоа­си ажойиб бизнесга қўл урди, зеро икки йил аввал Шкодранни «Сампдория»дан 8 млн. евро эвазига сотиб олганди. Валенсияликлар ҳимоя етакчисига ўринбосар сифатида «Зенит»дан Эсекьель Гарайни харид қилишди. Мустафи примеранинг аввалги мавсумида 30та ўйин ўтказиб, 2та гол урганди.

8. Садио Мане - 41,2 млн. евро «Саутгемптон» «Ливерпуль»

Англия футболи ичидаги энг қимматбаҳо трансферлардан бири Мане номи билан боғлиқ. «Авлиёлар» 24 ёшли сенегаллик вингерни сотиш эвазига 25 млн. евродан кўпроқ фойда кўришди. 2014 йилнинг ёзида «Саутгемптон» Садио учун «Зальцбург»га 15 млн. евро тўлаганди. Энди эса «Ливерпул»дан ушбу тезкор футболчи учун 41,2 млн. евро олди. Юрген Клопп ноёб ўйинчининг сафга қўшилганидан мамнун. АПЛнинг ўтган мавсумида Мане 37та ўйин ўтказиб, 11та гол ва 7та самарали узатма муаллифига айланган. Янги чемпионатда эса «Арсенал» дарвозасини ишғол қилишга улгурди.

7. Генрих Мхитарян - 42 млн. евро «Боруссия» Д.  «МЮ»

Арманистонлик ярим ҳимоячи олмон юртидаги фаолиятига якун ясаб, Англияни забт этишга киришди. Ўтган мавсум Мхитарян учун муваффақиятли тарзда кечди, турли сўровларга кўра, бундеслиганинг энг яхши ўйинчиси номига лойиқ кўрилди. Германия чемпионатининг аввалги мавсумида 31та ўйин ўтказган Генрих рақиблар дарвозасини 11 марта ишғол қилишдан ташқари, 20та вазиятда шерикларини самарали узатма билан таъминлади. Уч йил аввал «Боруссия» Мхитарян учун «Шахтёр»га 27,5 млн. евро тўлаганди, энди эса 27 ёшли футболчи учун «Манчестер Юнайтед»дан 42 млн. евро олди. Ҳозирча Генрих «МЮ» ўйинларига фақат захирадан қўшилмоқда, аммо Жозе Моуриньо янги шогирдига катта ишонч билдираётганини бот-бот таъкидламоқда.

6. Гранит Жака - 45 млн. евро «Боруссия» М. «Арсенал»

Евро-2016да Швейцария терма жамоасининг асосий фигураларидан бирига айланган 23 ёшли ярим ҳимоячи учун «Арсенал» 45 млн. евродан воз кечди. Шу тариқа, «канонирлар» ўз тарихларидаги энг қимматбаҳо трансферлардан бирига  қўл уришди. 2012 йили Менхенгладбахнинг «Боруссия» клуби Жака учун «Базел»га 8,5 млн. евро тўлаган. Германия чемпионатининг ўтган мавсумида Гранит 28та ўйинда 3та гол урганди. «Арсенал»даги дебют эса унча ўхшамади, «Ливерпул»­га қарши кечган баҳсда захирадан майдонга тушган Жаканинг ўйини қовушмади. Кейинги учрашувларда эса асосий таркибда кўриниш берди.

5. Лерой Сане - 50 млн. евро «Шальке» «Манчестер Сити»

«Манчестер Сити» Германия термаси ва «Шальке» клубининг ҳужумкор ярим ҳимоячисини ўз сафига жалб этиш мақсадида 50 млн. евронинг баҳридан ўтди. Трансфер бозорида 20 ёшли ўйинчи учун фақат бир марта бундан кўп пул тўланган: Раҳим Стерлинг 62 млн. эвазига «шаҳарлик»ка айланганди. «Шальке»нинг тезкор футболчисига эга бўлишни жуда хоҳлаган Хосеп Гвардиола эндиликда Санега катта ишонч билдирмоқда. Лерой бундеслиганинг ўтган мавсумида 33та баҳсда иштирок этиб, 8та гол урган, ўз нав­батида, шерикларини 6та самарали узатма билан таъминлаган. Олдинда уни Британия саҳнасида премь­ера кутмоқда.

4. Жон Стоунз - 55,6 млн. евро «Эвертон» «Манчестер Сити»

«Ман Сити»нинг яна бир йирик хариди - Англия термаси ва «Эвертон» клубининг 22 ёшли ҳимоячиси Стоунз. Келишув 55,6 млн.га баҳоланди. Дарҳақиқат, бу амплуа вакили учун йирик сумма. Аввалроқ «Челси» ҳам Жон учун курашганига қарамай, футболчи охир-оқибат «шаҳарликлар»га насиб этди. Қизиғи, 2013 йилнинг январида «Эвертон» «Барнс­ли» тарбияланувчиси учун 3,5 млн. еврога яқин маблағ сарфлаганди. Стоунз «Ман Сити» сафидаги дастлабки ўйинларини ўтказишга ҳам улгурди, ЕЧЛ саралашидан ўрин олган «Стяуа»га қарши баҳс шулар жумласидан. Жон АПЛнинг ўтган мавсумида 33та учрашувда иштирок этган.

3. Халк - 55,8 млн. евро «Зенит» «Шанхай SIPG»

Сўнгги тўрт мавсумни «Зенит» сафида ўтказган Халк Санкт-Петербургда қолишга қарши эмаслигини билдирганди, аммо Хитойдан келган таклифлар уни режаларини ўзгартиришга мажбур қилди. Питерликлар бразилиялик футболчини «Шанхай SIPG»га 55,8 млн. еврога сотиш орқали Россия трансфер бозорида ўзига хос рекорд қайд этишди. Халк ўтган мавсум 17та гол ва 16та самарали «пас» билан РПЛнинг энг сермаҳсул ўйинчисига айланди, Европа Чемпионлар Лигаси гуруҳ босқичида порлади. «Шанхай SIPG» сафидаги илк ўйинида тезкор гол муаллифига айланган футболчи кутилмаганда жароҳатланиб, ҳозирда асосий вақтини даволанишга сарфламоқда.

2. Гонсало Игуаин - 90 млн. евро «Наполи»  «Ювентус»

Игуаиннинг жамоасини алмаштириши нафақат жорий йил ёзи, балки бутун футбол тарихидаги энг йирик трансферлардан бирига айланди. «Ювентус» 28 ёшли аргентиналик форвард учун 90 млн. евро тўлади. Боз устига, Гонсало «Кекса синьора» сафини тўлдиргач, неаполлик ишқибозлар танқидига учради. Бошқа томондан, «Наполи» Игуаинни сотиш эвазига 50 млн. евродан кўпроқ фойда кўрди. Чунки 2013 йили ҳужумчи учун «Реал»га 39 млн. евро тўлаганди. Гонсало ўтган мавсум Италия «А» сериясида 35та ўйин ўтказиб, 36та голга муаллифлик қилганди. Дарвоқе, «Ювентус»даги дебютини ҳам гол билан нишонлади.

1. Поль Погба - 105 млн. евро «Ювентус»  «МЮ»

Трансфер бозорида янги рекорд гувоҳига айландик! 2016 йилгача футбол тарихидаги энг қиммат футболчи сифатида 101 млн. евро эвазига «Реал»га ўтган Гарет Бэйл эътироф этиларди. Бу кўрсаткич «Манчестер Юнайтед» ва Погба томонидан янгиланди. Франция термасининг 23 ёшли ярим ҳимоячиси бу маблағга арзийдими-йўқми - бошқа масала. Агар манкунианларнинг 2012 йили Полни «Юве»га эркин агент сифатида қўйиб юборишганини эътиборга олсак, мазкур харид янада ғалати туюлиши аниқ. Погбанинг Италия «А» серияси ўтган мавсумидаги статистикаси - 35та ўйин, 8та гол, 13та ассистентлик. «МЮ» сафида АПЛнинг иккита баҳсида иштирок этишга улгурди, ҳозирча рақиб дарвозасини ишғол қилиш у ёқда турсин, ҳатто самарали узатма муаллифига айлангани ҳам йўқ. Балки голларини «Манчестер Сити»га қарши кечадиган баҳсга асраётгандир?!
 

А.АҲМЕДОВ тайёрлади