Ироқ бош мураббийи: "Футболчилардан телефонни тортиб ололмайман"

Дастлаб унда Ироқ бош мураббийи Сречко Катанец ва футболчи Ҳумам Тариқ қатнашди.

"Гуруҳдаги дастлабки икки ўйиндан сўнг 6 очко тўпладик. Кейинги босқичга чиқиб бўлдик. Барчаси аъло даражада. Таркибдаги барча ўйинга тайёр, ҳеч қандай жароҳатлар йўқ. Бизда ҳеч қандай босим йўқ. Эртага чиройли баҳс бўлади деб ўйлайман, ўйлайман эмас аниқ шундай бўлади", - деб гап бошлади Сречко Катанец.  

Кейинги босқичда кимга қарши ўйнашимизнинг фарқи йўқ. Эртага майдонга фақат ғалаба учун чиқамиз.

Карлуш Кейруш 7 ёки 8 йилдан буён Эронни бошқармоқда. Мен Ироққа келганимга атиги 4 ой бўлди холос. Шу боис бизни таққослаш нотўғри. Эрон сафида топ футболчилар жуда кўп буни биламиз, бироқ биз ҳам осонгина таслим бўлмаймиз.

"Персеполис"ни узоқ йиллар бошқарган Бранко Иванкович билан алоқаларимиз ажойиб. Аммо ишонтириб айтаманки ундан Эрон терма жамоаси ҳақида маълумот олганим йўқ.

Футболчилар кўп вақтини ижтимоий тармоқларда ўтказмоқда? Ҳозир шундай замон. Техникалар ривожланиб бормоқда, шу боис мен футболчилардан телефон ёки планшетини олиб қўя олмайман", - дейди Катанец.

"Эрон кучли жамоа. Уларга қарши чиройли баҳс бўлади. Яратган қўлласа эртага 3 очкога эга чиқамиз. Барча йигитлар бунга тайёр", - дейди Ҳумам Тариқ.


Нарзулла Сайдуллаев ёзиб олди