Интервью. Жанни Инфантино: "Россия футбол тарихидаги энг яхши мундиални ўтказа олади"

Президент афсонавий «Лужники» стадионига ташриф буюрди. Москва мэри Сергей Собянин Инфантинони мундиал очилиш ўйини ва финал учрашувини қабул қиладиган стадионнинг реконструкцияси қандай кетаётгани билан таништирди. Бундан ташқари президент Москвадаги "Футбол уйи"га (Дом Футбола) ташриф буюрди, ЖЧ-2018 ташкилий қўмитаси билан яқиндан танишди. Россия Футбол Иттифоқи президенти ва ЖЧ-2018 ташкилий қўмитаси раиси Виталий Мутко билан бирга матбуот анжуманида иштирок этди.

FIFA президенти Жанни Инфантино Россияга ташриф ҳақида:
– Россиянинг 2018 йилги мундиалга кўраётган тайёргарлигидан жуда ҳам ҳайратдаман, бу чемпионат менинг президентлигимдаги илк мундиал бўлади. «Россия-2018» ташкилий қўмитаси ва РФИдаги дўстларимиз билан кўп лойиҳалар ишлаб чиқдик; бу мамлакатда футбол қанчалик катта ўрин тутишини билдим. Бу фақат ЖЧ-2018 билан боғлиқ эмас, РФИнинг келажак учун лойиҳалари ҳам ажойиб. Мутко ва унинг жамоаси катта иш қилишмоқда. Барчада футболга бўлган муҳаббат кўриниб турибди.

Никита Симоняннинг қўлидан унинг ЖЧ-1958даги Англияга қарши ўйиндаги расмини қабул қилиб олиш мен учун фахр, у футбол афсонаси; бундай инсонлар футболга меҳр уйғота олишади. Россия – ҳиссиётларга бой мамлакат, Жаҳон чемпионати мамлакатни дунёга олиб чиқиш имкониятини беради. Халқ мундиалдан сўнг ўз мамлакати билан фахрланиб юради. Россиядаги Жаҳон чемпионати ФИФАнинг янги лойиҳасининг муҳим бир бўлакларидан бири. Фақат битта савол жавобсиз қолмоқда: 2018 йилга қадар ким хориж тилини тезроқ ўргана олади: Мутко инглизчаними ёки мен русчаними.

ЖЧ-2018га тайёргарлик ҳақида:
– Бу мундиал тарихдаги энг зўр чемпион бўлади деган фикрни ўз миямга киритиб олдим. Барча ишлар дастур бўйича кетмоқда, барча объектлар белгиланган вақтда топширилиши борасида келишувга эришганмиз. Барча стадионлар 2017 йил декабрь ойига қадар ишга туширилиши керак, бу ерда Жаҳон чемпионатидан олдин баъзи тестлар ўтказиб олишимиз керак.

Россияда Жаҳон чемпионати орқали ажойиб инфраструктура пайдо бўлишини барча билиб турибди. Инсонлар келгуси йил Конфедерациялар кубоги ва икки йилдан сўнг Жаҳон чемпионатини сабрсизлик билан кутишмоқда.

«Лужники»га бўлган ташриф ҳақида:
– Стадионнинг тайёргарлигидан кўнглим тўлди. Олдинги ташрифдан сўнг кўп нарса ўзгарибди. Бу стадион 2018 йилда мухлислар ва футболчиларни ҳайратда қолдира олади. Стадион ичида футбол муҳитини ҳис қилиб туриш мумкин. Стадион кўринишида тарихий деталлар қолгани қувонтиради. Стадионнинг ўзи эса суперзамонавий кўриниш касб этмоқда, бу эса Жаҳоннинг энг катта мусобақасини ўтказиш учун керак бўлган нарса.

Видеотакрорлар ҳақида:
– ФИФА президентлигимдаги дастлабки 50 кунда IFAB томонидан қабул қилинган қарор энг муҳими бўлди. Биз видеотакрорларни синовдан ўтказишни бошлаб юборганмиз, шунда ҳакамларга анчагина ёрдам берамиз. Кўпчилик буни анчадан буён кутиб юрганди. Умид қиламанки, Россиядаги Жаҳон чемпионатида видеотакрорлар ҳакамларга ёрдам берган илк мундиал бўлади.

Россияга илк ташрифи ҳақида:
– Россияга футбол кўриш учун келишни сабрсизлик билан кутаяпман. Бу ерда кучли клублар жуда кўп. Россияда илк бор 1997 йил «Динамо» стадионига мухлис сифатида келгандим. Ўша сафардан 3та шарф ҳамон сақланиб қолган, сабаби жуда совуқ эди.

Виталий Мутко, РФИ президенти ва «Россия-2018» ташкилий қўмитаси раиси:
– Жанни Инфантинони Москвада кўриб турганимдан хурсандман. ФИФА президенти сифатидаги илк ташрифини айнан Россияга қилганидан мамнунман. Яна бир бор Жанни Инфантинони ФИФА президенти бўлгани билан табрикламоқчиман. У ҳақиқ йпрофессионал ва меҳнаткаш. Россиядаги мундиал унинг учун президент сифатидаги илк катта мусобақа бўлади. Биз «Лужники» ва «Футбол уйига» ташриф буюрдик. Ҳали жуда узоқ йўл бор, уни шараф билан босиб ўтамиз.

Умид қиламизки, бу ташрифдан сўнг Россия – футбол мамлакати эканига яна бир бор амин бўлади. Инфантинонинг келажаги катта, ҳали ўзини ёрқин томонларини оча олгани йўқ. Ишонаманки у билан биргаликда футбол тарихидаги энг яхши Жаҳон чемпионатини ўтказамиз.

Нарзулла Сайдуллаев таржимаси