"Интер" — ТОП-3га кирмайди, "Лацио" ва еврокубок финалчилари — ТОП-5дан ташқарида. А Сериянинг энг қиммат клублари

А Серия стартига ҳам икки ҳафтадан камроқ вақт қолди – "Наполи" янги мураббий билан титулни ҳимоя қилишга уриниб кўради. Эски чемпионлар "Милан" ва "Интер" ҳам бош соврин учун курашда фаол бўлмоқчи. Еврокубокларсиз қолган "Ювентус" ҳам чўққига қайтиш орзусида, "Лацио", "Аталанта", "Рома", "Фиорентина" ва қолган клублар еврокубок йўлланмалари учун курашишади. "Ошпаз қанчалик зўр бўлмасин, масаллиққа яраша таом бўлади" дейишганидек, бу курашда таркибдаги футболчилар муҳим фактор ҳисобланади. Таркиб борасида эса ҳозир, ҳали мавсум бошланмаган бир пайтда, мисол учун нархидан келиб-чиқиб фикр юритишимиз мумкин. Бугун таркибининг нархи бўйича А Сериянинг ТОП-5 жамоасига тўхталамиз.

1. "Наполи" — 566,5 миллион евро

Чемпион таркибнинг асосий аъзоси Виктор Осимхен жамоада қоладиганга ўхшайди – унинг шартномаси 2025 йилгача амал қилади. Клуб президенти Аурелио Де Лаурентиснинг одатдагидек "яхши иштаҳаси" нигерияликнинг харидорларини қўрқитиб юбориши ҳайратланарли эмас. Президент музокарани камида 140 млн евродан бошлашини эшитган "Реал" ҳам бу "кўчага кирмай" қўя қолди.

Қолган топ ижрочилар – Распадори, Кварацхелия, Зелиньски, Ангисса, Лоботка ҳам ҳеч қаерга кетмайди. Фақатгина Ким Мин-Жэ "Бавария" сафига бориб қўшилди. Бироқ биргина бу "Наполи" рақамларига кескин таъсир кўрсата олмайди. Бундай ҳолат янги мавсум омадсиз ўтса ва нархи кескин ошган Виктор Осимхен ва Хвича Кварацхелия сингари футболчиларгап бўлган "баҳо" ўзгариши натижасида юз бериши мумкин. Клуб Лучано Спаллетти билан хайрлашди ва бош мураббийлик курсисига Руди Гарсияни таклиф қилди. Мутахассис яқин ўтмишда "Ал Насср"да ишлагани ёдингизда бўлса ажаб эмас.

2. "Милан" — 561,25 миллион евро

"Россонери" янги мавсумдан умидлари айниқса катта – улар "Челси"дан икки футболчи Рубен Лофтус-Чик ва Кристиан Пулишични Миланга олиб келиб улгуришди. Салоҳияти юқори, эҳтимолий янги юлдуз Ноа Окафорни "Зальцбург"дан, "Вильярреал"дан Самуэль Чуквуэзе, "Валенсия"дан Юнус Муса ва АЗ клубидан Тижани Рейндерсни ўз таркибларига жалб этишди. Италия чемпионати ўлчовлари билан гапирадиган бўлсак, бу таркибни топ-кучайтириш.

Бу харидлар маълум бир вазиятда юз бермаслиги ҳам мумкин эди. "Милан" – бу "Сити", "Реал" ва ҳатто "Арсенал" ҳам эмас. Жамоа ўйин атрофида қурилган таянч ярим ҳимоячиси Сандр Тоналисиз қолди – 23 ёшли италияликни "Ньюкасл"га 65 млн еврога сотиб юборишди. Шунингдек, Анте Ребич ҳам клубини алиштиришга қарор қилди. Бугун-эрта Шарль Де Кетеларенинг трансфери ҳам ҳал бўладиган бўлиб турибди. Ёш ярим ҳимоячини "Лейпциг", ПСВ, "Ланс" ва "Астон Вилла" ўз сафида кўришни истаётган бўлса, А Сериянинг бошқа бир клуби "Аталанта" бу курашда барчадан олдиндалиги айтилмоқда.

Айни дамда Стефано Пиоли қўл остида нархи бўйича А Сериянинг иккинчи жамоаси бор. Шу ўринда "Милан"нинг захира ўридиғи ўша "Наполи"дагидан ҳам яхшироқлигини таъкидлаш лозим. Қўшимчасига, "россонери" янги футболчиларсиз ҳам неаполликларни мағлуб этиш усулини кўрсатиб беришди.

3. "Ювентус" — 494,5 миллион евро

"Кекса синьора" мухлислари учун ҳозир қийин даврлар ўтмоқда десак, муболаға бўлмас. Ҳозирга келиб Массимилиано Аллегри – жамоани ЕЧЛ финалигача олиб борган кучли мутахассис эмас. Ўтган мавсум "бьянконери" учун майдон тақшарисидаги зарбалар туфайли ҳам янада қийин бўлди – жамоа очколардан махрум қилинди, кейин яна қайтариб берилди – ва яна уларни олиб қўйишди. Иккинчи поғонадан еврокубоклар чегарасигача тушиб кетишди. Энди эса жамоа Конференциялар Лигасига ҳам қўйилмади.

Бошқа томондан "Юве" кучли ва нархи қиммат ижрочиларини сақлаб қолмоқда ва таркибга янгиларини олиб келиш ниятида. Италиядан кетгиси келмаётган Ромелу Лукаку Туринга кўчиб ўтиши ҳақида миш-мишлар тобора баландроқ янграяпти – "Челси"ни рози қилиш учун Душан Влаховични қўйиб юборишга ҳам тайёрлар. Сербиялик салоҳиятли, ёшроқ бўлсада, топ даражада сермаҳсуллик борасида Ромелуга ютқазиши аниқ. Уёқда ортиқ Францияда қолишни истамаётган Доннарумма "Бавария"га кетиши мумкин бўлган Щеснини алиштирадиган бўлиб турибди.

Ёзги трансфер ойнаси якунигача жиддий йўқотишлар кутилмаяпти. Аламини "ичига ютиб юрган" Массимилиано Аллегри жамоаси яна катта ўйинга қайтиши ҳеч гап эмас. Қўшимчасига, ҳозир кўпчилик уларни фаворит сифатида кўрмаяпти.

4. "Интер" — 485,15 миллион евро

"Нерадзурри" таркибида Ромелу Лукаку ва Андре Онанани сақлаб қолганида – кучли учликда бўлишарди. Миланликлар бельгиялик марказий ҳужумчини тўлиқ сотиб олиш борасида узоқ музокара олиб боришди – жароҳатдан кейин ҳам жамоага унинг катта фойдаси тегди. Айнан "Челси" "кўнглига йўл топиш" учун ҳам "Интер" камерунлик голкиперини "Манчестер Юнайтед"га сотиб юборди.

Натижада бу трансфердан 52,5 миллион евро ишлаб олган италияликлар – биринчи рақамини йўқотиб бўлсада, "аристократ"лар билан суҳбатга қайтмоқчи эди. Бироқ бу орада Ромелу "Ювентус" билан алоқага чиқиб улгурди ва бундан хабар топган "Интер" раҳбариятининг фикри кескин ўзгарди. "Нерадзурри" ортиқ бельгиялик билан ҳамкорлик қилишни исташмади – футболчининг мурожаатлари ҳам вазиятни ўзгартира олмади.

Жамоа ҳужум чизиғига Маркус Тюрам, қанотга Хуан Куадрадо келди – ҳар иккиси эркин агент сифатида. Яна бир топ-трансфер– умидли хавбек Давиде Фраттези. Энди асосий таркибга тортадиган ёшроқ кипер топилса, трансфер ойнасини муваффақиятли ҳисобласак ҳам бўлади.

5. "Аталанта" — 375,75 миллион евро

ТОП-5да "Рома", "Фиорентина" ва "Лацио" бўлиши ҳам мумкин эди. Уларнинг барчаси яхши мавсум ўтказди – римликлар ЕЛ финалигача, "фиалкалар" КЛ финалида майдонга тушган бўлса, Маурицио Сарри ўйинчилари борасида мақтана олмаса ҳам А Серияда иккинчи ўринни банд этди.

Бироқ бергамолик футболчиларнинг нархи умумий қилиб олганда ҳамон каттароқ. "Аталанта" Хойлундни "Манчестер Юнайтед"га сотиб юборган бўлса, Ал Билол Туре жамоага олиб келинди ва ҳали Лукманни ҳам унутмаслик зарур. Жамоа ҳужумида ёш, салоҳияти юқори футболчилар доим топилади.

Шунга қарамай, "Аталанта" таркибида айнан ҳозир Европа грандлари кўз уза олмаётган гавҳар йўқки, жамоа таркибининг умумий нархи кескин пасайиши, рақобатчилари билан солиштирганда бироз қийинроқ бўлади.

Бу вазиятда биргина муаммо Гасперинининг ўта қаттиққўллиги ва янги иқтидорларни Бергамо олиб келиш қийин бўлишини кўрсатиш мумкин. 

Нозима Тўхтамирзаева таржимаси