Икром Алибоев: "Рақиб олдинга ўтгиси келмади, шу боис ўйин шиддаткор кечмади"

"Ҳар иккала жамоани дуранг натижаси қониқтирарди. Бир очко кўпроқ бизни қониқтирарди, чунки гуруҳдаги пешқадамликни сақлаб қолардик. Аммо улар ҳам негадир ўйнагиси келмади ва шу боис учрашув шиддатли тус олгани йўқ. Биз ғалаба учун майдонга тушгандик", - дея гап бошлади Икром Алибоев.

- Ғалаба иштиёқида чиққандик дедингиз. Аммо "Локо"нинг ҳаракатлари кўпроқ мағлуб бўлмаслик учун ўйналганга ўхшаб қолди. Стадионга ташриф буюрган кўплаб мухлислар ҳам кўрсатилган ўйиндан норози бўлишганини очиқчасига ошкор қилишди...

- Фақатгина ғалабани кўзлаб ўйнадик. Шунчаки рақиб катта куч билан ҳимояланиб, олдинга ўтгиси келмади. Ҳар хил тоифадаги мухлислар бор, улар эса гапираверишади.

- Футбол аввало мухлислар учун ўйналадику... Шахсан ўзингиз бу ўйинни оддий ишқибоз сифатида томоша қилганингизда, учрашувдан завқ олган бўлармидингиз?

- Футбол албатта мухлислар учун ўйналади. Аммо биз аввало Ўзбекистон шарафини ҳимоя қилдик. Тўртта жамоамиздан фақат "Локо" вазифани удаллаб, кейинги босқичга чиқди. Аксинча мухлисларимиз хурсанд бўлишлари керак. Баъзи ишқибозлар эса стадионда "пазор" деб бақиришди...

- "Локомотив"нинг кейинги ўйинларида омад тилаб қоламиз.

- Раҳмат, келгуси учрашувларда ҳам ишқибозларимизни хурсанд қилишга ҳаракат қиламиз.

Шаҳбоз Беғамов суҳбатлашди.