Ҳамиджон Актамов: “Муҳим очколарни қўлдан чиқардик”

— Учрашув кутганимиздан-да оғир ўтди, — дея сўз бошлади Ҳамиджон Актамов. — Бутун ўйин давомида бор эътиборини ҳимояга қаратган жамоага қарши ўйнаш доимо қийин бўлган. Бугун рақибимиз дарвозабони ва ҳимоячилари йигитларимизнинг эркин ҳаракат қилишларига йўл қўйишмади. Оддий айтганда, натижадан ҳам, жамоамиз ўйинидан ҳам қониқмадим. Афсуски, ғалаба қозона олмадик ва муҳим очколарни қўлдан чиқардик.

Ҳозир футболда номлар ҳеч қандай аҳамият касб этмайди. “Нефтчи” жамоаси Навоийга ўз етакчиси Мансур Саидов ҳамда Муҳсинжон Убайдуллаев, Муродбек Бобожоновсиз келган бўлса-да, ўзлари учун ижобий натижага эришди. Бироқ, йигитларимизга кўплаб вазиятларда аниқлик ва омад етишмади. Бу — футбол! Қолаверса, бугунги иссиқ ҳавода тўп тепиш ҳар икки жамоа аъзоларининг ўз имкониятларини тўла намойиш қилишига тўсқинлик қилди.

“Қизилқум” ПФК Матбуот хизмати.