Ҳалол футбол келишуви бузилдими?

Ўзбекнинг мақоли бор, "қон билан кирган, жон билан чиқади". Кеча рамзий терма жамоани эълон қилганимиздан сўнг ўз номини сир тутган, аммо клуби номини айтган шахс қўнғироқ қилди ва рамзий терма жамоада унинг жамоасидан ўрин олган футболчи, аслида очко йўқотилишига сабаб бўлганлиги бутун жамоа ундан шубҳа қилаётганлигини айтиб, у билан 2 кундан бери ҳеч ким гаплашмаётганлигини айтиб ўтди.

Демак, бу футболчи рақиб фойдасига ўйинни берган, демак, рақиб ўша жамоа футболчисини ўз томонига оғдирган. Демак, эркаклар ўртасида ташланган "БЕШГА" ҳиёнат қилинган.

Агар ҳозир барчасини иссиғида босмасак, "ўрганган кўнгил ўртанса қўймас", қабилада шудай ишлар давом этилаверади. Энг ачинарлиси шундаки, бу ишлар асосан вилоятларда содир этиляпти. У ердаги ўйинлар тўғридан-тўғри кўрсатилмаслиги, клубларда ўз истакларини амалга ошириш учун жуда ҳам яхши имконият.

Агар ўша футболчи ҳақиқатдан ҳам шундай ишни қилган бўлса уни жамоани ўзи жазолаши ва клубдан кетказиши керак, токи бошқаларга ўрнак бўлсин. Ушбу ҳолат исботланса, рақиб жамоадан очколарни олиб ташлаш лозим.

Ҳакамлар масаласи ҳал этилди, учга-уч ўйинларга нуқта қўйилди. Энди рақиб футболчисини ўз томонига оғдириш орқали ғалаба қозонмоқчи бўлганлар, нима учун терма жамоамиз ҳаттоки Бангладешдаги турнирдан ўта олмагани, нима учун Японияга шармандали ҳисобда мағлубиятга учраганлари, нима учун клубларимизни ОЧЛда битта ишни қойиллата олмаётганларини бир кўриб "завқлансинлар". Мана шундай ишлар давом этаверар экан, бизда натижа бўлмайди. Битта клуб бошладими, эртага иккинчиси ҳам давом эттиради. Индинга учинчиси.

Агар шу иш ҳақиқатдан ҳам бўлган бўлса, "шим ўрнига атлас иштон кийиб ол эркак", - деб мақолага якун ясаймиз.