Гус Хиддинк: "Россия 1/8 финалда Португалия билан ўйнагани яхшироқ, испанлардан фарқли, у ерда фақат Роналду хавфли"

"Бу вазиятда Португалия қулайроқ рақиб. Менга Испания термасининг ўйини ёқяпти. Жамоа комбинацион футбол орқали рақибни исталган вақтда жазолаши мумкин. Бир сонияга эътиборсизликка йўл қўйдингизми, испанлар сизни кечирмайди. Португалияда эса бунга фақатгина Криштиану Роналду қодир.

Роналду керакли вақтда, керакли жойда пайдо бўла олади. У кутилмаганда, рақиб эътиборидан қочиб, тўпга эга чиқади ва – бум!

Испания эса бутун ўйин хотиржам ўйин кўрсатиб, охирги 20 дақиқада рақибини таслим қилиши мумкин. Эрон "Қизил фурия"га қарши қандай ўйин кўрсатганига эътибор бердингизми? Биринчи бўлимда улар фақат ҳимоя ҳақида ўйлашди. Гол қўйиб юборгач, "О, келинглар, энди биз ҳам футбол ўйнаймиз" дейишди. Ҳамма кўрдики, бу уларнинг қўлидан келар экан. Улар яхши имкониятлар ярата олишди. Қайсидир вазиятларда, қайсидир маънода эронликлар испанияликлардан ҳам хавфлироқ ўйимн намойиш этишди!

Аммо ҳисобни тенглаштиришга улгуришмади. Бу дарс бўлиши керак. Бутун ўйин давомида фақат ҳимоя ҳақида, гол ўтказмаслик ҳақида ўйлаш нотўғри. Вазият исталган вақтда ўзгариб кетиши, натижада хатони тўғрилашга сизда вақт қолмаслиги мумкин", – деди Хиддинк.