"Галатасарой" Коутиньони ижарага олади

Туркиянинг "Галатасарой" клуби бразилиялик футболчига шу ҳафта "Астон Вилла"ни тезда тарк этиш имконини берадиган шартнома таклиф қилмоқда. Истанбул гиганти мамлакатда чоршанба куни трансфер ойнаси ёпилгунига қадар Бразилия терма жамоаси футболчисини таркибига қўшиб олмоқчи. "Галатсарой" АПЛ вакилини битимга кўндиришга уринмоқда. Аммо "Вилла" ўтган ёзда Коутиньони бутунлай ўзиники қилиш учун сарфлаган 17 млн фунтнинг ҳеч бўлмаганда бир қисмини қайтариб олишни истайди. 

Клубга янги бош мураббий Унаи Эмери тайинлангандан сўнг Коутиньонинг Жанубий Америкага қайтиши мумкинлиги айтилган эди. Собиқ "Ливерпуль" юлдузи жорий мавсумда бирорта гол урмади ва голли узатмани амалга оширмади. У ҳали Эмери қўл остида бирорта ўйин ўтказганича йўқ. 

Коутиньо "Астон Вилла"нинг энг кўп маош олувчи ўйинчиларидан бири ҳисобланади. У ҳафтасига 125 минг фунт ишлаб топади. "Галатасарой" футболчига асосий таркибдан жой ваъда қила олади. Унинг келаси йили еврокубокларда иштирок этиши эҳтимоли юқори.

Филиппе Коутиньо 2022 йилнинг январь ойида "Барселона"дан ижарага олинганди. Ажойиб ярим йилдан кейин футболчи доимий асосда Англия чемпионатига йўл олди.