Фёдоров хонадонида тарихий кунни нишонладик

Аввалига Юрий Пшеничников билан учрашиш учун белгиланган манзилга етиб бордик, белгиланган вақтдан 10 дақиқа ўтиб.

“Ассалому алайкум, қадрдонлар! Соғликларингиз яхшими, Ўзбекистондагилар яхши юришибдими?”, дея Юрий Павлович биз томон қадам босиб келарди. 74 ёшни қарши оладиган жаҳоннинг энг яхши дарвозабонларидан бири бўлган Пшеничников билан анча вақт суҳбатда бўлдик. Мен у кишига 4 йил аввалги интервьюни эслатдим. Уни ёд этганлигимиздан хурсанд эканлигини яширмади. “Аллақачон мени унутиб юборишган бўлса керак, бир неча кун аввал қўнғироқ қилганингларда бу апрель ҳазили деб ўйлаган эдим”, - дейди Лев Яшин шогирди.



Аслида кечаги кун ҳаётимда ўчмас из қолдирди. Бир кун келиб китоб ёзадиган бўлсам, албатта 9-10 апрель кунларига тўхталиб ўтаман. Кунни футболчиларимизга қўнғироқ қилиш билан бошлаган эдик. Аввалига Тихонов, кейин Фёдоровга. Тихонов шу кунларда учрашишга ваъда берди. Фёдоров эса... шу жойда Фёдоровни шахс сифатида жуда катта маънавий бой одам эканлигини таъкидлаб ўтишни лозим топдим. Уни биз кучли сардор сифатида биламиз, аммо ҳаммамиз ҳам уни жуда кучли инсон эканлигини билмаймиз. Мен кеча ўзим учун янги Фёдоровни кашф қилдим. ОАВга бўлган ҳурмати, ўзини тутиши, ҳақиқатдан ҳам кучли намуна белгиси.



“Нефтчи”ни чунонам эсладик, чунонам эсладик...

Олтин даврини айтмайсизми? Мамотов, Атоян, Дўрмонов, Филипов ва бизнинг суҳбатдошимиз Фёдоров. 

Фёдоров биз билан мулоқотда маҳаллий вақт билан соат 19:00да Тушова мавзесидаги “Салют” спорт мактаби қошидаги сунъий майдонда дўстлари билан футбол ўйнашини айтди. Кейин ўзи биз истиқомат қилаётган жойдан уйига олиб кетишини таъкидлади. Аввало биз унинг овора бўлишини истамасдик. Қолаверса, юлдуз футболчимизнинг дўстлари билан ўйин қизиқ эди. Табиийки, у ерда кўчадагилар эмас, собиқ юлдузлар ўйнашини тахмин қила олиш учун каллани кўп ҳам ишлатиш керак эмас эди. Буни қарангки, оз бўлса-да адашмаган эдик. Мен ва Фахриддин Исамуҳамедов аввалига узоқдан келаётган АЛЕКСЕЙ ПОЛЯКОВни бир кўришда таниб қолдик. Биз улардан анча аввал ташриф буюрганимиз учун, камерамизни тўғирлаб бўлгандик. Кейин ЕЧЛда “Ноу Камп” стадионида ЦСКА таркибида “Барселона” дарвозасини ишғол қилган, Россия Кубоги соҳиби Олег Корнаухов. Тўғрисини айтсам, фахрий ҳимоячи агар бизнинг олий лигамизда ўйнаса, кечаги ўйини билан тўпурар бўлади.

“Спартак”нинг 90-йиллардаги юлдузи Андрей Коноваловни ҳамма таниса керак. У 4 карра Россия чемпиони бўлган. Ўйинни четдан томоша қилиб турган пайтимиз, бир киши олдимизга келиб, қаердан эканлимизни сўради.



-   Тошкентдан келдик, бу йил Хиросимада Осиё ўйинлари ғолиби бўлганимизга 20 йил тўлди. Диққат марказимизда Фёдоров!
-   Вооо.... қадрдонлар, мен икки йил Ўзбекистонда тўп тепдим. Эҳ, Ўзбекистон (қувониб эслайди). Мен Хоразмнинг “Наримоновчи” жамоасида тўп тепганман. Қандай ажойиб мамлакат. Бозорда қовун Ўзбекистонники деб сотадиган сотувчиларни доимо койиганим койиган. Сенлар ўзи Ўзбекистон қовунини ростакам еганмисанлар дейман? Мен ҳар сафар уйга қайтаётганимда иккита катта “ракета” қовундан ҳарид қилиб олардим. Буни харид қилиш ҳам деб айтиб бўлмайди. Сизларда тўкин-сочинлик, ҳамма мевалар жуда арзон.



-   Кечирасиз, ўзингизни таништиринг.
-   Мен Юрий Иванов бўламан, Аҳмад Убайдуллаевга катта салом. 1979 йил жароҳат олиб касалхонада у билан бир палатада ётгандим. Афсуски, айнан ўша куни “Пахтакор” ҳалокатга учради. Аҳмаднинг аҳволини сизга бир сўз билан таърифлаб бера олмайман. Тунлари йиғлаб чиқарди. Мен кейин “Қайрат”да ўйнадим. Фаолиятимнинг энг чўққига чиққан пайтлари қозоғистонликлар билан боғлиқ. Сизларни кўрганимдан хурсанд бўлдим. Мени саломимни етказиш ёдингиздан чиқмасин.

Поляков кейин бизни таниб қолди, аниқроғи Фёдоров айтди. Қаердан ҳам танисин, у пайтда мен стадиондаги 50 000 томошабиндан бири бўлардим. Лекин ўзбекнинг ошини еган одамлиги билиниб турибди. Иккинчи бўлимда у биз турган томон дарвозани қўриқлаш учун келаётиб, тўғри Юрий Иванов билан суҳбатимиз пайтида олдимизга келди.



-   Салом, йигитлар. Москвага хуш келибсизлар, сизларни кўрганимдан хурсандман. Тошкентни соғиндим, ҳеч вақт бўлмаяпти-да. Айниқса паловни.
Яна машҳурлардан Андрей Нижегородов, Марат Махмутов каби футболчилар, 30 дақиқадан иборат иккита бўлимда тўп тепдилар.

Шундан сўнг Фёдоров бизни уйига олиб кетди. Суҳбатимиз жуда қизиқ ва узоқ давом этди. Биринчи қисм оила даврасида бўлди. Бугун Андрей Фёдоровнинг туғилган куни.
Суҳбатимиз якунига етиб бораётган бир пайт.



-    Андрей ака, яна бир неча дақиқалардан сўнг сиз 43 ёшга тўласиз. Шу кунгача футболчи сифатида уйда туғилган кунингизни нишонлаганмисиз?
-   (рафиқаси билан ўйланиб қолди) Буни қарангки эртага биринчиси бўлар экан. Қизиқ ҳолат. Ҳар сафар 10 апрель мавсум бошига тўғри келарди ва мен бу кунни оила даврасида нишонлай олмас эканман. Илк табрик учун сизга катта рамҳмат.

Шу тариқа биз Андрей Фёдоровнинг туғилган кунини унинг уйида қарши олдик. “Хиросима-94” ва “Кеча, бугун, эртага” лойиҳалари учун мазмунли суҳбат бўлиб ўтди. Туғилган кун тортини еб бўлгач, Андрей Фёдоров қоқ тунда бизни манзилимизга етказиб қўйди.

ТУҒИЛГАН КУНИНГИЗ БИЛАН, АНДРЕЙ АКА!!!

Нодирхўжа Юлдашев.