Футзал. Осиё чемпионати очилиш маросимида мухлисларни сюрприз кутмоқда

Пойтахтимиз мезбонлик қилувчи қитъа биринчилигининг "A" гуруҳидаги давтлабки ўйин Ливан ҳамда Қирғизистон терма жамоалари ўртасида бўлиб ўтади. Беллашув 16:00 да "Ўзбекистон" спорт саройида бошланади. Барча мухлисларни ушбу баҳсга таклиф этиб қоламиз. Ливан - Қирғизистон учрашувидан кейин 18:00 да "Ўзбекистон" спорт саройида Осиё чемпионатининг тантанали очилиш маросими бўлиб ўтади. Очилиш маросимида ҳали футзалда қўлланмаган лазер шоуга гувоҳ бўлишингиз мумкин. Маросим мухлисларни ҳайратда қолдириши шубҳасиз. Бир сўз билан айтганда 10 февраль куни "Ўзбекистон" спорт саройига ташриф буюринг ва барчасини ўз кўзингиз билан кузатинг.

Шу куни 19:00 да эса Ўзбекистон терма жамоаси мусобақадаги "юриши"ни бошлайди. Вакилларимиз биринчи турда Саудия Арабистони терма жамоасига қарши кураш олиб боради.

Бундан ташқари, шу куни "Универсал" Спорт ва гимнастика саройида "B" гуруҳи вакиллари биринчи тур учрашувларини ўтказишади. 16:00 да Ироқ - Хитой, 19:00 да эса Эрон - Иордания ўйини ўтказилади.

Эслатиб ўтамиз, Осиё чемпионатида дастлабки бешта ўринни банд этган терма жамоалар шу йилнинг 10 сентябридан 1 октябрига қадар Колумбияда бўлиб ўтадиган Жаҳон чемпионатига йўлланмани қўлга киритади.